دنيز کؤچو (پووئست- پريتچا)
Müəllif: Firuz Mustafa


2017-10-17 08:02:58


فيروز موصطافا

دنيز کؤچو

(پووئست- پريتچا)

کيم ذره آغيرليغيندا بير خئييرائتسه، اونو(ن صوابيني) گؤتوره جک و کيم ذره آغيرليغيندا بير شر ائتسه، اونو(ن جزاسيني) گؤره جک.
قرآني-کريم. الزلزله،8 -7


چيچک اؤزونون بوتون اولدوزلاريني ايتيرميش سحر سماسينا شيکايتله نير: " من شئه دامجيمي ايتيرميشم".
ر.تاقور

***
البته، سن قوشلارين، حئيوانلارين، باليقلارين ديليني آنلايير، اونلارلا صؤحبتلشيرسن. حتّی، اوتلارلا و چيچکلرله ده دانيشا بيليرسن. بس اؤز اطرافينداکي آداملارين ديليني نئجه، آنلايا بيليرسنمي؟ و ائلجه ده، اينانيرسانمي کي، او آداملار سني دويور و آنلايير؟ نييه سوسورسان؟ جاواب وئرسنه...
***
بو غئيري-عادي احوالات قطعييين اويدورما دئييل. اونو قوجا بير باليقچي نين ديليندن ائشيتميشم. ***
… آما ايندييه جن توقايدان بير سوراق يوخ ايدي.
قادين اؤزونه يئر تاپا بيلميردي.
هله گوندوز ايدي. آما قادينا ائله گليردي کي، هاوا آرتيق قارانليقلاشيب، گونش ندنسه واختيندان اول باتيب.
قادين واهيمه لندي. اولجه پيچيلتي ايله، سونرا ايسه اوجادان اوغلونو هارايلاماغا باشلادي: " توقاي، اوغلوم… " اونون تيترک سسي اؤزونه ده ياد گلدي. ائله بيل بو سس اوزاقلاردان، آز قالا قويونون ديبيندن گليردي.
واخت حيسس اولونمادان، سسسيز-سميرسيز اؤتوب کئچيردي. سانکي بو سسسيزليک هر شئيين اوستونه، گؤزله گؤرونمه سي مومکون اولمايان، يالنيز اورگين دويا بيله جگي سويوق بير پرده چکميشدي.
توقايدانسا بير خبر يوخ ايدي.
" توقاي، اوغلوم… هاراداسان؟ "
***
کيچيک قصبه نين اوجقاريندا حَيَطلري آز قالا بير-بيرينه بيتيشيک، اوستو قيرميزي کيره ميتلي ايکي بالاجا ائو واردي. اوزاقدان باخاندا بوائولرين داملاري قوشا دووشان قولاغينا اوخشاييردي. ائولردن بيرينده توقاي آدلي جاوان اوغلان اؤز آناسي ايله ياشاييردي. قونشوداکي ائوين ساکيني ايسه شهلا آدلي بير قيزدي. بو باره ده بير قدر سونرا... هله ليکسه، قصبه و توقايلا باغلي صؤحبتيميزي داوام ائتديرک.
بو قصبه نين ساکينلري، اساسن، باليقچيليقلا مشغول اولوردو. دوزدور، قصبه دنيزدن خئيلي آرالي ايدي؛ حتّی، بورادان هئچ دنيز گؤرونموردو ده. آما نهنگ دنيزين عطري، اونون نميشليک و يوسون دولو قوخوسو بو یئرلرده آيدينجا حيسس اولونوردو. آداملار چوخ واخت اؤز ايشلريني دنيزدن اسن کولگين سمتينه گؤره قوروردولار: اونلار چاليشيرديلار کي، باليق اووونا الوئريشلي هاوا شراييطينده چيخسينلار. همين گون عادي گونلردن بيري ايدي.
توقايين آناسي حَيَطه چيخيب اليني گؤزونون اوستونه قوياراق، گؤيه ساري بويلاندي. اوزاقدا آغ يئلنلي بوز بولودلار گؤرسه نيردي. آما او بوز بولودلارين گئت-گئده توندلشمه سي قادي نين قانيني قارالتدي. دئيه سن، بولودلار دنيزين اوستونه توپالاشيردي. آنانين حئسابينا گؤره، توقاي دنيزدن چوخدان قاييتمالي ايدي. اونون اورگيني نيگارانچيليق حيسسي بورومه يه باشلادي: " گؤره سن، اوغلوم نييه گئجيکير؟ بلکه دنيزده فيرتينا قوپوب؟ بلکه تورا باليق دوشمه ييب؟ بلکه نه ايسه باش وئريب؟ بلکه... " آنانين گؤزلري يوللارا ديکيلميشدي. توقايدانسا بير خبر-اتر يوخدو.
آتاسيني ائرکن ايتيرميش اوغلان لاپ کيچيک ياشلاريندان برکه-بوشا دوشموش، يئري گلنده آناسي ايله بيرگه قونوم-قونشولارا دا کؤمک ئتميشدي. عاييله جمعي ايکي نفردن عيبارت اولسا دا، دولانيشيق چتين ايدي. بو طرفلرده گوزراني خوش کئچنلر بارماقلا ساييلاجاق قدر آز ايدي. سانکي ياخينليقداکي نهنگ دنيزي، نهنگ دنيزين ساحيلينده کي کيچيک قصبه ني و نهنگ دنيزين ساحيلينده کي کيچيک قصبه نين ساکينلريني تانري اؤزو ده بيردفه ليک اونوتموشدو. "يوخ، گؤرونور، بيز اؤز تانريميزي اونوتموشوق، اوغلوم. تانري اؤز ياراتديغيني هئچ واخت اونوتماز... اينسانلار آسان يوللا دولانماق ايسته ييرلر. چوخلاري باشا دوشمک ايستمير کي، ياشاماق اوچون گئجه-گوندوز تر تؤکمک لازيمدير. تانري هئچ کسين اذيتيني يئرده قويماز، اوغلوم... " بو، تئز-تئز توقايين آناسي نين تکرار ائتديگي سؤزلر ايدي.
توقاي اذيتدن قورخان دئييلدي. آناسي نين بعضاً دوداقالتي- پيچيلتي ايله، بعضاً ایسه اوجادان، آوازلا اوخودوغو دوعالار اونون چاليشماغا اولان شؤوقونو داها دا آرتيريردي.
سون واختلار توقاي باليقچيلارلا دوستلاشميشدي. او، بعضاً گئجه لر بئله، قاييقلا آچيق دنيزه، باليق اووونا گئديردي. تورا دوشن باليقلارين بؤيوک بير قيسمي ساتيشا چيخاريليردي. چوخ واخت بيرگه اووا گئتديکلري ياشلي باليقچي نين وئرديگي کيچيک باليقلار ائوده اونلارين سوفره سينه ده گليب چاتيردي. بئله آنلاردا اؤز اؤولادي نين قازانجيني گؤرن آنانين اورگي فرحدن داغا دؤنوردو.
قادين چوخ ياخشي بيليردي کي، اوغلو هئچ ده آسانليقلا چؤرک قازانمير. اونا حتّی او دا معلوم ايدي کي، توقاي دفعه لرله ياشلي باليقچيلارين يومروق داواسي نين شاهيدي و ايشتيراکچيسي اولوب. البتته، باليغين بول اولدوغو ساحه لر اوغروندا موباريزه آپاراراق، دنيزي "بؤلمک" ايسته ين بو ياشلي آداملارين دجل اوشاقلار کيمي سؤيوشوب بير-بيري نين اوستونه جومماسي، البه ياخا اولوب سوپورلشمه سي چوخ گولمه لي و… هم ده آغلامالي ايدي. هله اولسون کي، بو کوبود " دنيز آداملاري" نين - باليقچيلارين، داوا-دالاشي زاماني، آرادا فورصت تاپان کمفورصتلر توقايا دا بير-ايکي "ياغلي" يومروق ايليشديرميشديلر. آما توقاي ائوده بو باره ده آناسينا ايندييه جن بيرجه کلمه ده اولسون دانيشماميشدي؛ قادين بو داوا-شاوا باره ده قونوم-قونشولاردان ائشيتميشدي و اورگي نين درينليگينده اوغلونون آغزيبوتؤولوگوند خئيلي ممنون قاليب، اونا قلبن "برک آللاه!" دا دئميشدي؛ آخي آغزيبوتؤو آداملارين، عادتن، خاصیيتلري ده بوتؤو اولور...
توقايدانسا هله بير خبر-اتر يوخ ايدي.
»توقاي، هارادا قالميسان، آي اوغول؟»...
***
توقايين گئجيکمه سيندن ناراحات اولان تکجه آنا دئييلدي. حَيَطده وورنوخان آلاباش دا ايري-توتقون گؤزلريني تئز-تئز اوزاق اوفوقلره ديکيردي. او اؤز "دوستو" نون دنيزدن نه واخت قاييداجاغيني، عادتن، اولجه دن بيلردي. بئله کي، کؤپک، توقاي گلمه ميشدن خئيلي اول داروازانين آغزيندا سسيز-سميرسيز دايانار، گؤزونو يولا ديکه ردي. اصلينده، ايندي توقايين يولونو گؤزله ين تکجه آنا و آلاباش دئييلدي. توقايين ديگر "دوستلاري" - قارتال و باليق دا نيگارانچيليق ايچينده وورنوخوردو.
توقاي حئيوانلاري و قوشلاري چوخ سئويردي. حَيَطده اؤز "دوستلاري" اوچون راحات شراييط ياراتميشدي. ايت اؤزونون پالچيق و قاميشدان هؤرولموش کيچيک داميندا، قارتال ائوين چارداغيندا، باليق ايسه گئنيش حوووضدا ياشاييردي. ايت، قارتال و باليق تکجه توقايلا دئييل، چوخ غريبه دير کي، هم ده اؤز آرالاريندا بير-بيرلري ايله دوستلوق ائديرديلر. اونلارين همرأيليگيندن خبر توتان ياخين قونوم-قونشولار مات-معطل قالميشديلار؛ هئچ بئله ده ايش اولار؟ سحردن آخشاماجان ايتله قارتالين گونو بير يئرده کئچيردي. هله بو هاراسيدير! ايستي هاوالاردا اونلار، يعني ايت و قارتال، باليغين قوناغي اولوردولار؛ بئله واختلاردا اونلارين هر اوچو، يعني باليق، قارتال و ايت حوووضدا آتيليب-دوشور، لاپ بير-بيريلري ايله ظارافاتلاشان دجل اوشاقلار کيمي سس-کوي ساليرديلار. اوللر اونلارين حرکتينه جيددي محل قويمايان آنا و توقاي، آرتيق "دوستلار"ين بير-بيري ايله ديل تاپيب "دانيشديقلارينا" ، آز قالا آدام کيمي "صؤحبت ئلديکلرينه " ، قطعييين شوبهه ائتميرديلر. طبيعتين قوينوندا بير-بيري ايله يولا گئتمه يه ن همين عجايیب جانليلار بو حَيَطده اصل دوست اولموشدولار!
توقاي اؤز "دوستلار"ينا آد دا قويموشدو. عاقيللي گؤزلري پار-پار يانان باليغي - "ياقوت" ، قانادلاريني گئن-بول آچيب وورنوخان قارتالي "آيقوت" ، حَيَطده گزيب-دولاشان آلاباشي "قايوت" دئيه، چاغيريردي. اگر ديققت يئتيريرسينيزسه، بو آدلارين هاميسي توقايين اؤز آديندان تؤرمه دير. ان غريبه سي و ماراقليسي ايسه بو ايدي کي، "دوستلارين" هاميسي اؤزونون داشيديغي آدي چوخ گؤزل آنلاييردي؛ سانکي اونلار بو دونيايا ائله بو آدلارلا گلميشديلر. توقاي "آيقوت" دئين کيمي، قارتال اوچوب اونون يانينا گه لر، چيينينه قوناردي. اؤز آديني ائشيدن آلاباش، يعني «قايوت» بير گؤز قيرپيميندا اؤزونو توقايا يئتيرر، دال آياقلاري اوسته قالخيب بير-ايکي آغيز هورردي. «ياقوت» دا عزيز دوستونون چاغيريشينا ديققتسيز قالمازدي؛ اؤز آديني توقايين ديليندن ائشيدن باليق، قيندان چيخان گوموشو قيلينج کيمي سودان سييريليب اوزو يوخاري آتيلار، هاوادا قؤوس جيزيب تزه دن اوزو آشاغي ميللنه رک حوووضون درينليگينه باش ووراردي. بعضاً حَيَط-باجادا آدام اولماياندا دوستلار حوووضون باشينا توپلاشاراق "اؤز ديللرينده" نه باره ده سه اوزون-اوزادي "دانيشيب صؤحبتلشه رديلر" .
چوخ واخت توقاي اؤزو ده بو دسته يه قوشولار، اونلارين "صؤحبتينه " قولاق آساردي. کناردان باخان اولسايدي، اونلارين حقيقتن ده نه باره ده سه "صؤحبتلشديگيني" ظن ائدردي.
توقايينسا "دوستلارين" هر بيري ايله تانيشليغي نين اؤز تاريخچه سي واردي.
آلاباشي اونا اوزاق قوهوملاريندان بيري باغيشلاميشدي. مسئله بوراسيندا ايدي کي، همين قوهوم واختيله مئشه دن تاپيب اهليلشديرديگي، ايندي ايسه قاپيدا ساخلاديغي آنا ايتين بالالاريندان ياخا قورتارماق اوچون، اونلاري توربايا ييغيب اوزاق اوبالارين بيرينه آپارميش، اورادا مئشه يه بوراخيب اؤز ائوينه قاييتميشدي. بير نئچه گوندن سونرا کوچوکلردن بيري اوزون يولو قطع ئديب گئري دؤنموش، تزه دن اؤز صاحیبيني تاپميشدي. همين آدام بوندان سونرا کوچويو دفعه لرله آزديرماق ايستسه ده هئچ بير نتيجه حاصيل اولماميشدي؛ چوخبيلميش کوچوک هر دفعه ، گئدر-گلمز اوچون حئسابلانميش "اوزاق سفرلر" دن ائوه ساغ-سالامات قاييتميشدي. اونون اليندن بئزن صاحیبي، گونلرين بير گونو، داها سرت قرار چيخارماق باره ده دوشونن واخت توقاي اونلارا قوناق گلميشدي. کوچويون "قوچاقليغي" باره ده حئکايته قولاق آسان توقاي اونو توربايا ساليب ائوه گتيرميشدي. بير-ايکي گون اوزون، پاسلي زنجيرباغدا قالان کوچوک تئزليکله ائو-ائشييه مئهر سالميشدي. آز سونرا باغدان آچيلان کوچويون آرتيق بو مئهريبان عاييلهني ترک ائتمک آرزوسو، دئيه سن، بيردفه ليک يوخا چيخميشدي.
يئني يئتمه نين قارتاللا دوستلوغونون دا غريبه تاريخچه سي واردي. توقاي بير دفعه دنيزدن قاييدارکن قاياليقلاردا خيشيلتي ائشيتدي. اولجه ئله بيلدي کي، بو، ايلاندير. اونا گؤره ده يولونو دييشمک ايسته دي. آما آز سونرا قايانين ديبينده کي نهنگ قوشو گؤروب ايستر-ايسته مز آياق ساخلادي؛ سرت-بوز قايايا سيغينميش قارتالين کين-غضب دولو گؤزلري توقايين اوزونه سانجيلميشدي. دئيه سن، "سما پلنگي" يارالي ايدي. توقايلا قارتال اوزون موددت اوز-اوزه، گؤز-گؤزه دايانديلار. سونرا اوغلان آستا، ائحطيياتلي آدديملارلا قوشا ياخينلاشدي، اَييليب قارتالين باشيني ائهمالليجا سيغاللادي. قوش بوينونو ايره لي اوزاديب قانادلاريني يانا آچماق ايسته دي. توقاي يالنيز ايندي گؤردو کي، قارتالين بير قانادي آچيلمير. آچيلمايان قانادين آلتيندان سيزان قاني گؤرنده ايسه اوغلان اؤز قناعتينده يانيلماديغيني آنلادي. قارتال آياغي نين بيريني ايره لي اوزاديب جايناغيني شستله اوغلانين قولونون اوستونه قويدو. توقاي بو "ژئستي" ، بئله ارکيانا اداني، گله جک دوستلوغا ايشاره علامتي حئساب ائده رک اَييليب قوشو يئردن گؤتوردو، اونو قوجاغينا آليب ائوه گتيردي. توقايين آناسي قارتالين قانادينا ملهم قويوب ساريدي. قوش تئزليکله ساغالدي. آما، دئيه سن، اونون بو حَيَطدن بير داها اوچوب گئتمک فيکري يوخدو. حتّی، توقاي اونو بير دفعه قولتوغونا ووروب واختيله تانيش اولدوقلاري عونوانا - دنيزساحيلي قاياليقلارا آپاردي. اوغلان ائوه گلنده گؤردو کي، قوش ائوه اوندان اول اوچوب گليب، آرتيق حَيَطده دير و دوستلاشديغي آلاباشلا شيرين-شيرين "صؤحبت ائدير" .
باليغي ايسه توقاي باليقچي تورونون ايچيندن تاپيب گتيرميشدي. عادتن، اوودا تورا جوربجور باليقلار دوشور. آما نه تجروبه لي باليقچيلار، نه ده گنج توقاي بو سولاردا ايندييه جن بو جور باليغا تصادوف ائتمه ميشديلر؛ بو، گوموشو، ظريف، گؤزل، اسرارانگيز بير جانلي ايدي. سونرالار توقايين "ياقوت" دئيه، چاغيرديغي بو سو سوناسي نين عجایيب حرکتلري ائله ايلک دقيقه دن ديققتي جلب ئتميشدي: او، اصل رقاصه لر، چئويک ايدمانچيلار کيمي، سودا يورولمادان آتيليب-دوشوردو. اؤزو ده نئجه؟ قويروغونون اوستونده ديمديک دايانيب فيرفيرا کيمي گاه ساغا، گاه دا سولا دوغرو فيرلانير، اويونبازلار ساياغي مزه لي-گولمه لي حرکتلر ئديردي. توقاي اونو طاماهکار باليقچيلارين اليندن زورلا خيلاص ائديب ائوه گتيرديگينه گؤره داخيلي بير ممنون لوق دويوردو. اوللر بو غريبه باليغا قاني قاينامايان، اورگي يوووشمايان آنا دا، آرتيق مئهريني ياقوتا سالميشدي؛ بوش واختلاريندا باليغين "رقصينه" تاماشا ائتمکدن دويمايان قادين، هردن اؤزونو ساخلايا بيلمه ييب اورکدن گولردي...
...توقايدان خبر-اتر يوخ ايدي. ندنسه، هئچ "دوستلار"ين دا سس-سميري گلميردي. عادتن، بو واختلار حَيَطه گليب آنايا باش چکن شهلا دا، ترس کيمي، بو گون گؤزه ديميردي.
اونسوز دا توقايين گئجيکمه سيندن ناراحاتليق حيسسي کئچيرن قاديني، بو "ديلسيز-آغيزسيزلارين" غملي، دردلي گؤرونوشو ده بير ياندان اوزوردو. آخي بونلارا نه اولموشدو بئله؟ بلکه اورکلرينه نسه داميب؟ بلکه اونلار نسه بير شئي بيليرلر؟
- سيزه نه اولوب بئله؟.. نييه دينيب-دانيشميرسينيز؟
ديليندن غئيري-ايختيياري قوپان بو سؤزلر آنانين اؤزونو ده حئيرتلنديردي. آخي او کيمه موراجيعت ائديردي؟ قارتالا؟ باليغا؟ آلاباشا؟ مگر اونلار آنانين دئديکلريندن بير شئي باشا دوشه سي ايديلر کي؟ قادين داها دا حئيرتلندي. بئله کي، اونون خيطابيني ائشيدن "دوستلار" حوووضون باشينا توپلاشيب اولجه ياواشدان - "پيچهاپيچلا " ، سونرا ايسه اوجا سسله" خوسونلاشيب" سانکي نييسه " موذاکيره ائتمه يه " باشلاديلار.
آز سونرا يئنه آرايا سوکوت چؤکدو. آلاباش آياقلاريني سورويه-سورويه حوووضدان آرالانيب حيسس اولونمادان حَيَطدن چيخدي. آنا يالنيز ايندي خاطيرلادي کي، بير دفعه ده بو جور حاديثه باش وئرميشدي؛ او واخت ائوه گئج گلن توقايي قايوت "تاپيب" ائوه گتيرميشدي. سن دئمه، همين گون دنيزده طوفان باشلاييبميش و بونا گؤره ده توقاي اؤز باليقچي دوستو ايله مئشه گؤزه تچيسي نين کوماسيندا گئجله ييبميش... سونرالار توقاي دانيشيردي کي، همين گئجه کؤپک اونون پئنجگي نين اتگيندن ياپيشيب آز قالا دارتا- دارتا اؤز ائولرينه، آناسي نين يانينا گتيريب چيخاريب. بلکه توقاي بو گون يئنه مئشه ده - همين کومادا گئجله ييب؟ بلکه آلاباش اؤز دوستونو يئنه تاپيب ائوه گتيره جک؟
آما ايت بو دفعه تئز قاييتدي. يقين بو، او دئمک ايدي کي، توقاي ائله ده ياخيندا دئييل. چونکي آنا ياخشي بيليردي کي، ايرثن ماليک اولدوغو حيسس ائتمه قابيليتي آلاباشي آلدادا بيلمز.
ايت گئري قاييداندان سونرا قارتال اونا ياخينلاشدي. قانادلاريني گئنيش آچيب بير خئيلي موددت ماتديم-ماتديم قايوتو، يعني آلاباشي سوزدو. ايت بير-ايکي آغيز هوردو. اونون يانيقلي-بوغوق سسيني ائشيدن ياقوت، حوووضدا چيرپينماغا باشلادي. قارتال اورکدن قيي چکيب آياغيني يئردن اوزدو، قاناد آچيب ائوين اوستونده بير نئچه دفعه دؤوره ووردو.
بو اثنادا داروازادان ايچري بير قيز گيردي؛ هه، بو، قونشو قيز شهلا ايدي. قيز ائله بيل کي، بو قصبه يه ناغيللار دونياسيندان قاچيب گلميشدي. هورکک، جئيران يئريشلي، آهو دوروشلو، سروقامتلي بير قيزدي شهلا. نئجه دئيرلر، آيا دئييردي سن چيخما من چيخيم، گونه دئييردي سن چيخما من چيخيم. شهلانين بو دونيادا اولان-قالان بير آناسي واردي. غريبه ايشدير، ئله بيل کي، طبيعت آنا-بالاني خاصيتجه بير-بيري نين عکسينه ياراتميشدي: آنا آدامايوووشماز، قيز ايسه جاذيبه دار ايدي... اصلينده شهلاني ننه سي بؤيوتموشدو؛ بير موددت اؤنجه قاري دونياسيني دييشندن سونرا قيز قارادينمز، قاشقاباقلي آناسي ايله ياشاماغا مجبور اولموشدو. شهلا داريخيردي. او، گؤيده کي آي کيمي تنها ايدي؛ ندنسه اونا ائله گليردي کي، آي دا اونون کيمي داريخير. آما آي گؤيده، او ايسه يئرده...
قادين بير آنليغا خياللار عالميندن آيريليب ايره لي يئريدي، حيسس اولونمادان، آز قالا کؤلگه کيمي سسسيز-سميرسيز حَيَطه داخيل اولان قونشو قيزين قارشيسينا چيخدي.
- سالام، خالا...
- سالام، قيزيم.
- من قارتالين قيي سسيني ائشيديب گلديم. بير حاديثه-زاد اولماييب کي؟...
-حاديثه ؟.. يوخ... آما توقاي دنيزدن گليب چيخماييب. يامان نيگارانام، آي قيزيم...
- اينشاللاه، گه لر، خالا. داريخمايين...
ندنسه، قيزين سسي آزاجيق تيتره ييردي. اصلينده، شهلا اؤزونون گيزلي هيجانيني بوغماغا چاليشيردي؛ آما، دئيه سن، بونو باجارميردي. اونون هيجاني سببسيز دئييلدي. اؤتن گئجه شهلا اؤز اوتاغيندا، آچيق پنجره اؤنونده کي ياتاغيندا، اوزانيب سمادا سايريشان اولدوزلاري اوزون- اوزادي سئير ائله ميشدي. او سونرا بو سونسوز و سيرلي سمانين قوينوندا، سانکي بير-بيري ايله هيم-جيمله "دانيشان" ، بير-بيرينه گؤز ووران اولدوزلارا باخا-باخا يوخويا گئتميشدي. سحره ياخين قيز غريبه بير يوخو گؤرموشدو: توقايين کيچيک قاييغي سولاري ياراراق ايره ليیه دوغرو شوتويوردو. ماوي، گؤز ياشلاري کيمي دوپدورو سولارين اوستونه سايسيز-حسابسيز رنگ به رنگ گوللر سپه لنميشدي. ان تعجوبلوسو ايسه بو ايدي کي، شهلانين اوستونده ياتديغي چارپايي، داها دوغروسو تاخت، بو ماوي سولارين قوينوندا، توقايين قاييغي نين آرخاسينجا اوزوب گئديردي. توقاي گولومسيه رک اونا ال ائدير، آرابير قيزا "هاوا اؤپوشو" گؤندريردي. سانکي شهلانين چارپاييسي قاييغا چئوريلميشدي. رنگ به رنگ سولارين اوستونه سپه لنميش رنگ به رنگ گوللرين عطري قيزي يوخودا بيهوش ائتميشدي. و شهلا آرادا فورصت تاپيب او گوللردن بير نئچه سيني اوووجلاييب دستله ميشدي ده. تزه-تر گوللرين پارلاق لچک لريندن سوزولن سو دامجيلاري قيزين سينه سينه، اوز-گؤزونه سپه لنميشدي. ندنسه، بو سويوق دامجيلار اونون صيفتيني اودلو ذره لر کيمي قارسيميشدي. شهلا يوخودان اوياناندا اؤنونده ياتديغي آچيق پنجره دن صيفتينه دامجيلايان ياغيش داملالاريني الي ايله سيلرکن حئيرته گلدي: آمان آللاه، پنجره دن چيسله ين بو داملالار بير آز اول يوخودا گؤردويو دامجيلار کيمي ايستي ايدي، قاينار ايدي. دئيه سن بس، باياق توقايين اونا عنوانلاديغي "هاوا اؤپوشلري"نين اودو-آلووو بو دامجيلارا هوپموشدو. شهلا ياتاقدان ديکه ليب پنجره ني اؤرترکن توتقون-گؤيومسوو شوشه دن اونا آي صيفتلي بير گؤزه لين باخديغيني گؤرنده، باياقدان اورگينده بولاق کيمي قاينايان حئيرت حيسسي داملا-داملا آرتيب گور، قاينار بير شلاله يه چئوريلميشدي؛ او، آز قالا اؤزو-اؤزونو تانيماياجاقدي! او نئجه ده بؤيوموشدو! سانکي همين آنلاردا اونا کيمسه، کنار بير آدام دا گؤز قويوردو. حالبوکي شهلا هميشه کي کيمي اؤز اوتاغيندا تک ياتميشدي. قيزين ياناقلاري اود توتوب يانيردي.
قيز هله ده او غريبه يوخونون تاثيري آلتيندا ايدي. و يوخودا گؤردويو او گوللرين خوش عطري هله ده اونون بورنوندان چکيليب گئتمه ميشدي. " گؤره سن، توقايين باشينا بير ايش گلمه ييب کي؟ " شهلا بو آنلاردا عاقلينا گلن قارماقاريشيق فيکيرلردن قورخويا دوشدو. آما اؤزونو اله آليب توختادي.
آنا بيليردي کي، دنيزه گئدن توقاي اوچون ان چوخ داريخانلاردان بيري ده قونشو قيز شهلادير. بونو بير قادين سؤوق-طبيعيسی ايله دويان آنا، قيزين اورگيندن کئچنلري، هم ده اونون بولاق سويو کيمي صاف-دورو گؤزلريندن، تيترک سسي نين هيجانيندان "اوخويوردو".
- هه، اودور ائي، قارتال قاييديب گلدي.
بونو باشيني قالديريب سمايا باخان شهلا دئدي. حقيقتن ده، بو، آيقوت ايدي. قوش هاوادا دؤوره ووروب حوووضون اوستونه قوندو. باشيني سودان چيخاران باليغين ايري، دونوق گؤزلري قارتالين اوزونه ديکيلدي. کؤپک ده اونلارا ياخينلاشدي. دوستلارين بو حرکتي شهلانين ديققتيندن يايينمادي. قيز:
- ائله بيل کي، بونلار صؤحبتلشيرلر، - دئيه، تعجوبله ديللندي.
آنا کدرلي تبسسومله دئدي:
- هه، ائله دير، قيزيم، دوز تاپميسان، صؤحبتلشيرلر.
بو زامان ائله بير حاديثه باش وئردي کي، حئيرتدن آنا ايله شهلانين اللري اوزونده دونوب قالدي. اولجه، آلاباش يايدان آتيلان اوخ کيمي داروازايا ساري شيغيييب بير آنداجا گؤزدن ايتدي. آز سونرا، ياقوت حوووضون ساکيت- دورغون سويونو خنجرکيمي ياريب يوخاري توللاندي. بير موددت سانکي هاوادا دونوب قالان باليق، تزه دن اوزواشاغي ايستيقامت گؤتوروب سويون درينليگينه باش ووردو. باليغين بو غريبه حرکتي بير نئچه دفعه تکرار اولوندو.
قيز چيگينلريني چکيب بؤيوک بير ماراق حيسسي ايله سودا چيرپينان باليغي سوزه رک:
- بونا نه اولوب بئله؟ - دئيه، سوروشدو.
آنا:
- يقين توقايين خيففتيني چکير، - دئيه، کدرله جاواب وئردي.
باليقسا، دئيه سن، ساکيتلشمک ايسته ميردي. او گاه آتيليب-دوشور، گاه سودا چيرپينير، گاه دا اؤزونو حوووضون سويوق ديوارلارينا چيرپيردي. بو منظره ني سئير ئدن قارتال غفيلدن قانادلاريني يانا آچيب آياغيني يئردن اوزدو، حوووضون اوستونده بير نئچه دفعه دؤوره ووردو و بو آنلاردا سودان سييريليب هاوايا آتيلان گوموشو باليغي جلد قاپاراق جايناغينا گؤتوروب قيي ووردو.
قارتال بير آنداجا گؤزدن ايتدي.
آنا ايله شهلا يئرلرينده دونوب قالميشديلار. هاندان-هانا اؤزونه گلن شهلا ديللندي:
- يقين قارتال باليغي پارچالاياجاق...
هله ده گؤزو گؤيلرده اولان آنا سانکي اؤز-اؤزونه دانيشيرميش کيمي:
- يوخ، اولا بيلمز، - دئدي و علاوه ائتدي: - آخي، اونلار ياخين دوستدورلار.
- بس ائله ايسه اونلار نييه قاچيب آرادان چيخديلار؟...
- من ده مات-معطل قالميشام. دوغروسو، سون واختلار توقاي بعضاً ائوده اولماياندا اونون عطريني-قوخوسونو بونلاردان آليرديم. بونلارسا بئله... يني بو قدر اعتيبارسيز ايميشلر؟ اولسون کي، ايندي بونلار توقاي يوخدور دئيه قاچيب گئتديلر. حئييف منيم ظنيمه. بونلارا يامانجا اينانيب مئهر سالميشديم. گؤرونور، سهو ائله ميشم. ائه، آي بالا، ايندي آداملارين چوخونون اعتيباري آزاليب، او کي اولا آللاهين ديلسيز-آغيزسيز قوشو-حئيواني... شهلا، قيزيم، دئييرم بلکه اوغلومون باشينا نسه گليب؟... ديليم-آغزيم قوروسون، بلکه او، طوفانا دوشوب؟.. بلکه بالام دنيزده سويتيلرينه، ييرتيجي باليقلارا راست گليب؟ بلکه... بلکه...
شهلا آنايا خئيلي اورک-ديرک وئرسه ده بونون ائله بير خئيري اولمادي؛ آز سونرا قادي نين گؤز ياشلاري اونون سولغون ياناقلاريني "يوماغا" باشلادي. شهلا حيسس ائديردي کي، آناني غم درياسينا دوچار ائدن تکجه اوغلونون دنيز سفرينده بئله لنگيمه سي يوخ، هم ده توقايين حَيَطده کي "دوستلار"ينين - آلاباشين، باليغين و قارتالين غفيلدن آرادان چيخماسي، "اعتيبارسيزليغي" ايدي.
دوغرودان دا، گؤره سن، "دوستلار"ا بيردن-بيره نه اولموشدو بئله؟ اونلار دوغما اوجاغي نييه ترک ائتميشديلر؟... بلکه اونلار توقايين يوخا چيخماسيندان ايستيفاده ائديب داغيليشماق قرارينا گلميشديلر؟ آخي هرنئجه اولسا دا، اونلارين دا اؤز دوغما وطنلري واردي. باليغين وطني-دنيز، قارتالين وطني-سما، ايتين وطني ايسه مئشه ايدي.
درد آناني اوزوردو. شهلا هله ده آنايا تسللي وئرمکده ايدي.
***
غفيل فيرتينا توقايلا قوجا باليقچيني دنيزين اورتاسيندا هاقلادي. بير گؤز قيرپيميندا هاوا توتقونلاشدي. قورغوشون کيمي آغير دالغالار اونلارين يونگول قاييغيني يارپاق کيمي آتيب-توتماغا باشلادي. آرتيق قاييغين ايچينده کيچيک سو گؤلمچه سي يارانميشدي. توقاي آوارلارين دستگيندن برک-برک ياپيشاراق دالغالارين قوجاغيندا ييرغالانان قاييغي ساحيله دوغرو ايستيقامتلنديرمک ايسته يير، قوجا باليقچي ايسه دمير پارچلا قاييغين ايچينه دولان سويو هر وجهله بوشالتماغا چاليشيردي. آما اونلارين هر ايکيسي نين جهدي، دئيه سن، عبث ايدي. چونکي دالغالار قاييغي دنيزين درينليگينه دوغرو چکيب آپاريردي. بير ياندان دا قاييغين ايچينه دولان سو، آزالماق عوضينه، ائله بير ياندان هئي آرتماقدا ايدي.
دوزلو، سرت دالغالار ترس شيلله لر کيمي اونلارين صيفتينه چيرپيليردي.
قوجا باليقچي نين بوغوق، خيريلتيلي سسي سانکي او بيري دونيادان گليردي:
- توقاي!.. توقاي!.. مؤحکم دايان...
توفان باشلانمازدان بير قدر اول نؤوبتي اوودان الده ائده جگي گليري دوداقالتي ميزيلداياراق دؤنه-دؤنه حئسابلايان، آرابير آميرانه طرزده توقايين اوستونه قيشقيريب موخته ليف امرلر وئرن ("قاييغي ساغا دؤندر! " ، "سورعتي آرتير!" ، "تورا چاتاندا آوارين دستگيني منه وئر!" -دئيه، هايقيران)، قوجا باليقچي نين يالواريش دولو نيدالاري ائشيديليردي؛ ايندي قوجانين سسي کولگين آغزيندا يارالي قوش کيمي چيرپيناراق گئت-گئده اؤله زيیيردي. قوچا عمللي-باشلي خوفا دوشموشدو؛ او ايره لي اَييله رک آوارين دستگيندن قوشا ال ایله برک-برک ياپيشميشدي. اصلينده اونون بو "کؤمگي" توقايا مانع اولوردو: آوارلاري بو وضعيتده چکمک، قاييغي ايداره ائتمک داها دا چتينلشميشدي. توقاي يوماق کيمي بوزوشوب قورخودان و سويوقدان تير-تير اسن قوجانين حاليني ياخشي آنلاييردي و ائله بو سببدن ده سوسوردو. دانيشسايدي بئله، ايندي کيم ايدي اونو ائشيدن؟ داخيلن او قدر ده خوشلاماديغي بو خسيس و زهملي آداما بو آنلاردا توقايين يازيغي گليردي. آما نه ائتمه لي؟ مگر يئره-گؤيه مئيدان اوخويان بو طوفان، بو فيرتينا قوجانين يالواريشلارينا محل قوياسي ايدي کي؟.. آغير دالغالار، زلزله دن اوچوب-داغيلان الچاتماز داغلارين هئيبتلي- واهيمه لي اوچقونلاري کيمي نريلده يه رک اونلارين اوستونه يئريیيب گليردي.
گئت-گئده قوجانين ناله سي ائشيديلمز اولوردو.
ايندي نه ساحيل گؤرونوردو، نه ده سما. سانکي اؤزو ايله فلاکت گتيرن سو بورولغاني بوتون اطرافي، حتّی گؤي اوزونو بئله، نهنگ دييرمان داشي کيمي فيرلاديردي.
نؤوبتي دالغالاردان بيري نين گوجلو و غفيل ضربه سي قوجا باليقچيني ووروب کوکره ين دنيزين، شاهه قالخان دالغالارين قوينونا آتدي.
قوجا بير آنداجا يوخا چيخدي؛ سانکي بو دونيادا هئچ ازلدن بئله بير آدام اولماميشدي.
توقاي اؤزونو ايتيرسه ده، اليني غئيري-ايختيياري قاييغين يان طرفينه آتدي؛ قوجانين باياقدان قوشا ال ایله دستگيندن برک-برک ياپيشديغي آوار، ايندي اونون اؤزو ايله بيرليکده يوخا چيخميشدي. دئمه لي، بئله چيخيردي کي، تا بو جهننم دييرمانيندان ياخا قورتارماغا بير ذره قدر ده اوميد قالماييب.
گؤره سن، دوغرودانمي آرتيق هر شئي باشا چاتميشدي؟
توقايين گؤزلري اؤنونده غئيري-ايختيياري دهشتلي بير منظره جانلاندي: سولارين قوينوندا آغزي اوسته جئوريلميش تنها قاييق، تک آوار، باليقلارا يئم اولان روحسوز جسد... يوخ، يوخ، او، اؤلمک ايستميردي! دوزدور، عادتن، ياشليلار دئييرديلر کي، اؤلوم حاقدير و دونيادا ياشايان هر بير اينسان اؤولادي گونلرين بير گونو اؤز عؤمرونو تانرييا باغيشلاماليدير. آما بو جور معناسيز اؤلوم... توقاي اؤز قيسا حياتي نين بئله بير باياغي و عئيني زاماندا، فاجيعه لي سونلوقلا باشا چاتاچاغيني هئچ واخت تصوورونه گتيرمه ميشدي. يوخ، او، ايندي بو سونلوغو ائله-بئله، ساکيت-سويوققانلي بير طرزده قارشيلايا بيلمزدي. او، هله مغلوب دئييلدي. او، ال-قولونو يانينا ساليب دوشمن قيلينجي کيمي غفيلدن باشي نين اوستونو آلان فلاکته بئله آسانليقلا تسليم اولا بيلمزدي.
بيردن-بيره توقايين گؤزلري اؤنونده، قورخونج اژداهالار کيمي شاهه قالخان دالغالارين آراسيندان، آناسي نين مئهريبان چؤهره سي جانلاندي. آنانين يانيندا بير قيز دا واردي؛ بو، شهلا ايدي. اونلارين هر ايکيسي - آنا و قيز، دنيزين ساحيلينده دايانيب اللريني شاهه قالخان دالغالارا ساري اوزاداراق سانکي پيچيلتي ايله قورخونج سولارا دوعا ائديرديلر. آنا دنيزدن ايمداد ديله ييردي.
بيردن-بيره دنيزين کؤکسونده اژداها آغزي کيمي آچيلان ديبسيز، قورخونج يارغانين اوستونو کؤپوکلو سولارين آغير "قاپاغي" اؤرتدو؛ توقايا ائله گلدي کي، باياقدان بورولغانا دوشه رک آز قالا دنيزين لاپ ديبينه ائنميش قاييغي غفيلدن هانسيسا بير گؤزه گؤرونمز ال دارتيب سولارين اوستونه قالديردي. قاييق سيلکه لنيب يئرينده چئوره جيزدي.
توقاي ديققتله اوزاقلارا گؤز گزديردي. هر طرف بوز-بولانيق سولارلا احاطه اولونموشدو. نه ساحيل گؤرونوردو، نه ده آنا...
***
سوسوزلوقدان ديلي-دوداغي اود توتوب يانان باليق تئز-تئز هاوادا لنگرلنن قارتالين جايناقلاري آراسيندا چابالاييردي. حتّی بير-ايکي دفعه آز قالا سوروشوب يئره دوشه جک، سرت-سيلديريم قايالارا چيرپيليب تيکه-تيکه اولاجاقدي. قارتال اونو چتين کي، اوزاق دنيزه بو مينواللا آپارا بيله يدي. مسافه نين اوزونلوغو بير يانا، گئت-گئده ياقوتون نفه سي تنگيیيردي. قارتال حيسس ائديردي کي، سوسوزلوق اونون دوستونو الدن سالماقدادير. سو بو آنلاردا ياقوت اوچون حيات دئمک ايدي.
بير آزدان آشاغيدان بوغوق شيريلتي سسي ائشيديلدي. هه، بو دا چاي! چاي! دره ايله اوزو آشاغي آخيب گئدن شففاف سويون عطري ياقوتو اوزاقدان ووردو؛ اونون اورگي آتلاندي. بودور، قارتال لاپ آشاغيدان، چايين اوستو ايله اوچماغا باشلادي! ياقوت چيرپينيب قارتالين جايناقلاري آراسيندان چيخدي، هاوادا فيرلانيب اؤزونو سورعتله آخان داغ چايي نين قوينونا آتدي. آيقوت بير موددت دوستونون باشي اوستونده دؤوره ووراراق دليجه سينه قيي چکدي. باليق سودان باشيني چيخاريب يوخاري باخدي؛ او سانکي قارتاللا ويدالاشماق ايسته ييردي. ائه، کيم بيلير، اونلار بير ده نه واخت گؤروشه جکديلر. قارتال اونو گؤروب قانادلاريني داها گئنيش آچدي. بو، او دئمک ايدي کي، آيقوت يوکسکليکلره، گؤيون درينليکلرينه باش وورماق ايسته يير.
سويون بيهوش ائديجي عطري اولجه سانکي ياقوتون عاقليني باشيندان چيخارميشدي. آما بو لذت اوزون چکمه دي. عؤمرونون چوخونو بؤيوک سولاردا کئچيرن، اولجه اوکئانين، سونرا ايسه دنيزين انگينليکلرينه باش ووران باليق داغ چاييندا اؤزونو ائله ده راحات حيسس ائتميردي.
او، بير واخت تصادوفن باليقچي تورونا دوشوب توقايگيلين حوووضونا آتيلاندا دا ائله بو وضعيته دوشموشدو. حوووضون ايليق، شيرين سويو اولجه اونا ياد گلميشدي. آما سونرا ياواش-ياواش آليشميشدي او ياد سويون عطرينه، دادينا...
ايندي ياقوت خيلاص اولاجاغينا، داها دوغروسو، ايستگينه چاتاجاغينا اينانيردي. چونکي او، ائله بو داغ چايي نين ايچيندجه، دوغما سويون اوزاقلاردان گلن خوش عطريني دويوردو؛ بو، نهنگ بير سو ايدي. بو، دوزلو دنيز سويو ايدي و ياقوت تئزليکله همين نهنگ، دوزلو، تانيش سويا باش وورماق ايسته ييردي. شوبهه سيز کي، ايندي ايچينده اوزوآشاغي اوزدويو بو داغ چايي آخيب، آخيب سوندا او نهنگ، دوزلو دنيزه قوووشوردو. باليق بونا امين ايدي. ائله بونا گؤره ده او، خيرداجا چاي باليقلاري نين، چؤمچه قويروق و قورباغالارين يانيندان سورعتله اؤتوب ايره ليیه دوغرو شوتويوردو. بورالاردا ايندييه جن بو بويدا، بو گوجده، بو گؤرکمده باليق گؤرونمه ميشدي. ياقوتون ايتي، مؤحکم "قانادلار"ي آرابير سوالتي اوتلارا، بيتکيلره، آغاج کؤکلرينه ايليشسه ده، او، اؤز يولوندان قالميردي. "قانادلار"يني گره رک، اونا مانع اولان هر شئيي دف ئدير، ايناملا و عينادلا ايره ليیه دوغرو اوزوردو. اوزاقدان دوغما دنيزين دوزلو سويونون خوش عطري گليردي.
***
هاوا قارالميشدي. آما آلاباشين دايانماق، دينجيني آلماق ايستگي يوخدو. او هر نئجه اولورسا-اولسون، اؤز دوستونون ايزينه دوشمک ايسته ييردي. توقايين ايیي، قوخوسو ايتين بورنوندا ايدي. توقايسا يوخ ايدي. اگر توقاي بو ياخين يئرلرده اولسايدي، آلاباش اونو لاپ آسانليقلا تاپا بيلردي. آما ايندي بورالاردا توقايين هئچ بير علامتي حيسس اولونموردو؛ اونون نه ايزي واردي، نه ده توزو.
آلاباش دنيز ساحيلينده کي قاياليقلارا يئتيشدي. ايري، قورخونج دالغالار، قودوز ايتلر کيمي اولاييب هيددتله نهنگ سال داشلارا چيرپيليردي. بورادا دا توقايين قوخوسو دويولموردو. اگر توقاي بورالاردا اولسايدي، ايت اونون يئريني ائله همين آنداجا موعينلشديرر، ايره لي شوتويوب اؤز دوستونون اوستونه آتيلار، حتّی ظارافاتلا اونو قورخوزاردي دا. آخي توقايلا قايوتون اؤزلرينه مخصوص ظارافاتلاري دا واردي.
بير دفعه ده اينديکينه بنزر حاديثه باش وئرميشدي؛ دنيزه نؤوبتي سفردن قاييتمالي اولان توقاي ائوه گليب چيخماميشدي. اوندا دا، باخ ائله اينديکي کيمي، آنا ناراحاتليق ايچينده وورنوخوردو. قارانليق دوشنده قايوت اؤزونو ساخلايا بيلمه ييب ساکيتجه حَيَطي ترک ائتميش، اؤز دوستونون آختاريشينا چيخميشدي. همين گئجه دنيزده فيرتينا قوپموشدو، مؤحکم ياغيش ياغيردي. آما آلاباش آرتيق اؤز دوستونون ايیيني آلميشدي: او، هاراداسا ياخينليقداکي مئشه ده اولمالي ايدي! او واخت ايت اؤزونو مئشه يه- آغاجلارين سيخ يئرينه وورموشدو. هه، سن دئمه، قايوت سهو ائتمه ييبميش: توقاي غفيل ياغيشدان قورونماق اوچون مئشه گؤزتچيسي نين کوماسينا تشريف آپاريبميش. اوندا توقاي اؤز دوستونو کومانين آغزيندا گؤروب اولجه حئيرتلنميش، سونرا ايسه سئوينجيندن قهرله نيب ياغيشين آلتيندا سويو سوزولن ايتي باغرينا باسميشدي. آز سونرا اونلار، آلاباش و توقاي، بيرليکده ائوه دؤنموشدولر. آخ، اوندا آنا "دوستلارين" ساغ-سالامات قاييتديغيني گؤروب نئجه ده سئوينميشدي!
آما ايندي... بو يانلاردا توقايين قوخوسو دويولموردو. ايتين ايسه، ائوه توقايسيز قاييتماق نيیتي يوخدو. يقين کي، آنا دا "دوستلارين" بيرليکده گلمه سيني گؤزله ييردي.
***
قارتال سورعتله اوزوآشاغي آخان داغ چايي نين اوستونده سونونجو دفعه دؤوره ووراندان سونرا قانادلاريني گئن-گئن آچيب، آچيق سمايا دوغرو ايستيقامت گؤتوردو.
آرتيق هر شئي آرخادا قالميشدي: توقاي گيلين ائوي ده، آنا دا، شهلا دا، باليق دا، باليغي اوزوآشاغي آپاران داغ چايي دا. ايندي قارتالين عزيز دوستو آلاباش دا اوزاقلاردا ايدي. آما قارشيدا نهنگ، تانيش بير دنيز واردي. او دنيزين ساحيلي قاياليق ايدي. بير واخت قارتال اووچو گولله سينه توش گليب يارالانميش، خيلاص اولماق اوچون بو بوز قايالارين آراسيندا گيزلنميشدي. اوندا توقاي اونو گؤروب مئهريبانجاسينا باشينا سيغال چکميش، سونرا ائوه گتيريب يئمله ميشدي. آنانين قويدوغو ملهم تئزليکله قوشون قانادلاريني ساغالتميشدي. آما قارتال ساغالاندان سونرا دا همين قاپيدان گئتمه ميشدي. او، قلبن ايسينميشدي، باغلانميشدي بو ئوه، بو اوجاغا.
ايندي توقايين بيردن-بيره يوخا چيخماسي، هامي کيمي اونو- آيقوتو دا، سانکي سارسيتميشدي. آنا ايله شهلانين کدرلي سيماسي بير آن دا اولسون قارتالين گؤزلري نين اؤنوندن چکيليب گئتميردي. يوخ، داها دؤزمک اولمازدي! "دوستلار"ين هر اوچو آختاريشا چيخميشديلار؛ اونلارموطلق توقايدان بير سوراغ اؤيرنمه لي ايديلر. ائله بو جورده ائتديلر: قرارا آلديلار کي، توقايين گئتديگي ايستيقامته اوز توتسونلار. اونلار بير-بيريني سؤزسوز بئله آنلاييرديلار... توقاي دنيزه گئتميشدي. دنيزين ايسه اوجو-بوجاغي يوخدو.
قارتال دنيزين ايیيني اوزاقدان آلدي. اونون اورگي چيرپينماغا باشلادي. اودور، باخ اورادا، دنيزين ساحيلينده قاياليقلار واردي و بير واخت قوشا محض اورادان - او قايالارين آراسيندان گولله آتميشديلار. ايندي يقين کي، قارتال اؤز دوشمنيني گؤرسه يدي هئچ ندن قورخماز، ايلديريم کيمي شيغيييب اؤز اينتيقاميني آلار، اونون قاناديني قيران کسين يا گؤزلريني اووار، يا دا اوز-گؤزونو جيرماقلاييب شيليم-شيليم ائدردي... يوخ، بلکه ده هئچ نه ائتمزدي اؤز دوشمنينه؛ آخي او واخت همين تصادوف اولماسايدي آيقوت توقايلا راستلاشا، سونرالارسا دوستلاشا بيلمزدي. ايندي توقايسيز اونا بو سونسوز سما دا دارليق ائديردي.
قاياليقلارداسا اينس-جينس گؤرونموردو. عادتن، ياخينليقدا بير هنير، بير نفس دويان قوشون- آيقوتون جانيندا غريبه تيتریيشلر اولوردو. سانکي بئله آنلاردا اونون اورگيندن "دالغالار" اؤتوب کئچردي. و ان غريبه سي ده بو ايدي کي، هر کسين اؤز "دالغاسي" اولوردو: آلاباشين، باليغين، آنانين، شهلانين "دالغالاري". بو "دالغا " سئلينده توقايين دا اؤز "دالغاسي" واردي. اگر ايندي توقاي بو ساحيلده، بو قاياليقلار اطرافيندا اولسايدي، اونون ايچينده کي او "دالغالار" موطلق حرکته گه لر، اونو ايستر-ايسته مز دويوق سالاردي.
"دالغا"لارسا ياتيردي. آما دنيزين دالغالاري ساحيل قايالاريني دؤيجله ييردي.
قارتال اوجا قايالاردان بيري نين ذيروه سينه قوندو.
دنيز اؤز ابدي نغمه سيني اوخويوردو. باليقلارين ساحيلده قويدوقلاري "قولاقلاري "- باليققولاقلاري ايسه دنيزين سيرلي نغمه سيني دينله ييردي.
***
- شهلا، قيزيم، من بوتون گئجه ني دنيزه يالوارميشام. دئييرم، منه رحمين گلسين، آي دنيز. کيپريگيمله اود گؤتوروب بير اؤولاد بؤيوتموشم. قوي اونون تويونو ائديم، قوي نوه-نتيجه گؤروم، آي دنيز. يقين کي، دنيز آنا اورگيندن کئچنلري دويار، ائشيدر، قيزيم. آخي من هميشه هامييا ياخشيليق آرزولاميشام بو دونيادا. ائله منيم اوغلوم توقاي دا هامييا کؤمک ائديب، ال توتوب. او، تورا دوشموش باليغي خيلاص ائديب، صاحیبي نين آزديرماق ايسته ديگي آلاباشي حَيَطده بؤيودوب، يارالي قارتالي ساغالديب... باخ، منيم اؤولاديم بو جور اوغولدور: حليم، مئهريبان، خئييرخاه...يقين کي، دنيز منيم سسيمي ائشيدر، قيزيم. آخي دئييرلر، دنيزين ده قولاغي اولور. منه رحمين گلسين، دنيز. من آنايام...
***
بوتون بو باش وئرنلر توقايا قورخونج يوخونو خاطيرلاديردي. و اونون اورگي نين درينليگينده بئله بير اينام واردي کي، توش گلديگي بو دهشتلر، فلاکتلر تئزليکله چکيليب گئده جک، توقاي تزه دن ساحيله دؤنه جک، ائولرينه قاييداجاق، "دوستلاريني" گؤره جک، اؤز گليشي ايله آناني و شهلاني سئوينديره جک. آما، هله ليک، هر طرف قارانليغا غرق اولموشدو. فيرتينا سنگيسه ده اوزاقدان يئنه توکورپه ديجي اوغولتولار ائشيديليردي. آرابير توقايين ياخينليغيندا، قاييغين دوز بورنونون اوجوندا عجايیب-قرايیب دنيز جانليلاري آتيليب-دوشوردو.
او آرتيق ايستيقامتي ايتيرميشدي. تک آوارلا حرکت ئتمک اولدوقجا چتين ايدي. قاييق دئمک اولار کي، دالغالارين قوودوغو ايستيقامته کور-کورانه اوزوردو. گؤره سن، بو مينواللا نه قدر اوزمک، هاراياجان گئديب چاتماق اولاردي؟
آناسي نين عادتن دارا دوشنده ايشلتديگي بير سؤز ايندي غفيلدن اونون دا ديليندن قوپدو: "يا تانريم!" غفيلدن آغير، يوغون گه مي کنديرلري کيمي بير-بيرينه دولاشيب اونون اوستونه آتيلماق، بوغازينا دولانماق ايسته ين دالغالارين اوستونه بير الچيم ايشيق دوشدو و ائله همين آن او تهلوکه لي، "دويونلنميش" "کندير کلفي" آچيلماغا باشلادي؛ فيرتينا سنگيدي؛ سانکي گؤزه گؤرونمز بير ال، شاهه قالخان دالغالارين اوستونه "اوتو" چکدي؛ قاييق سونسوزلوقدان آسيلميش ننني کيمي آستا-آستا يئللندي. قطران کيمي قارا دالغالارين اوستونده برق ووروب پار-پار يانان او بير الچيم ايشيق پارچاسي سوروشوب قاييغين ايچينه - توقايين اوستونه دوشدو.
" يا تانريم! "
بلکه ده بو، ائله تانري نين گؤندرديگي بير ايشيق تؤحفه سي ايدي؟! بلکه ائله تانري نين اؤزو اونون کؤمگينه، خيلاصينا گلميشدي؟!
"يا تانريم!"
اونو حئيرت بورودو؛ ايندي "يا تانريم!" - دئيه، هاراي قوپاران تکجه توقاي دئييلدي؛ اؤزو و اوزو گؤرونمه يهن آنا دا اؤز سسيني اونون سسينه قوشموشدو. توقاي ميليونلارلا سسين ايچينده آسانليقلا تانييا بيلردي بو سسي!...
"يا تانريم!"
بلکه تانري ائله آنانين هاراييني ائشيديب اونون اوغلونون کؤمگينه گلميشدي؟
فيرتينانين شاهه قالديرديغي نهنگ دالغالار آرتيق ماغاراسينا قاييدان شير کيمي چکيليب گؤزدن ايتميشدي...
هاوا ايشيقلاشاندا توقاي حيسس ائتدي کي، آرتيق يوخوسوزلوقدان اوزولور. او، آواري بوراخيب اؤتري ده اولسا دينجيني آلماق اوچون، قاييغين ياش دؤشمه سينه اوزاندي. بير آزدان اونو يوخو توتدو...
او غريبه بير يوخو گؤروردو. گؤروردو کي، اؤز حَيَطلرده اوتوروب آناسي ايله صؤحبت ائدير؛ قارتاللا آلاباش توقايين ديزي نين اوستونده ايدي. بو واخت داروازا دؤيولدو. توقاي يئريندن قالخماغا ماجال تاپماميش قاپيدا غريبه بير مخلوق گؤروندو: بو، قويروقلاري اوسته يئريين نهنگ بير باليق ايدي! ان تعجوبلوسو ايسه بو ايدي کي، باليق عمللي-باشلي آدام ديلينده دانيشيردي! باليق يوخاري توللانيب آز قالا هيککه دن بوغولا-بوغولا سوروشدو:
- منيم بالام هاني؟
"منيم بالام هاني؟" يقين کي، باليغين اؤولادي دا باليق اولاردي. بو، بلکه ائله حوووضداکي باليغين، يعني ياقوتون آناسيدير؟ اولسون کي، آنا اؤز اؤولاديني آختارا-آختارا اونلارين حَيَطينه گليب چيخميشدي. توقايين آناسي ايره لي يئريیيب دئدي:
- سه نين بالان حوووضدادير.
نهنگ باليق يوخاري توللانيب حوووضا باخدي. سونرا غضبله قيشقيردي:
- بس هاني؟.. حوووض بوشدور کي... هاني منيم بالام؟..
آنا و توقاي حوووضا باخديلار. حوووض حقيقتن بوش ايدي. اورادا نه ينکي باليق، هئچ سو دا يوخ ايدي. نهنگ باليق هيددتله قويروغونو حوووضون ديوارينا چيرپماغا باشلادي.
ضربه دن نه ينکي حوووض، آز قالا بوتون حَيَط ييرغالانماغا باشلادي. ائله بيل زلزله باش وئرميشدي. آلاباشلا قارتال پنجه-پنجه يه، آنا ايله توقايسا ال-اله توتوب باليغين اوستونه ساري يئريديلر. نهنگ باليقسا اونلارا اهميت بئله وئرمه دن قويروغونو غضبله اويناديب، حوووضون ديوارينا و يئره داها آغير ضربه لر ائنديرمکده ايدي...
توقاي گؤزلريني آچدي. حقيقتن ياخينليقدان تاققيلتي سسلري ائشيديليردي. اونا ائله گلدي کي، ائولري نين اؤز حَيَطينده دير. حتّی، آياغا دوروب ضربله دؤيولن داروازاني آچماق ايسته دي.
آما اطرافا بويلاناندا ايندييه جن گؤردوکلري نين بير يوخو اولدوغونو آنلادي. دوغرو اولانسا تکجه تاققيلتي سسلري ايدي. او، آواردان برک-برک ياپيشيب ايره لي بويلاندي.
"آمان تانريم "!
باياق يوخودا گؤردويو عجايیب تانيش وارليق اؤزونون ايري، کوت باشي ايله قاييغين بورنونو دؤيجله ييردي. اونون بير سويو قايوتا بنزه ييردي. وحشي يقين کي، ياد هنيرتيني دويوب بير قدر گئري چکيلدي، سونرا يوخاري آتيليب تزه دن سويون آلتينا باش ووردو.
ايندي دنيز تاماميله ساکيتلشميشدي.
قاييق يئرينده ننني کيمي ييرغالانيردي.
توقاي ايکيللي، برک-برک ياپيشديغي تک آوارلا سويا تکان وئردي. قاييق قؤوس شکلي جيزدي. عظمتلي، نهنگ وحشي نين هئيبتلي باشي يئنه سويون اوزونه چيخدي.
توقاي يئرينده دونوب قالميشدي.
نهنگين سويوق و دونوق باخيشلاري ايتي اوخ کيمي اونون گؤزلرينه ديکيلميشدي. بيردن وحشي ايره لي آتيليب قاييغا کلله ايله دالبادال ضربه لر ائنديرمه يه باشلادي. سو دامجيلاري لوله دن پوسکورن اودلو قيرمالار کيمي اطرافا سپلندي. قاييق لنگر ووروب يئريندن ترپندي... توقاي آواري يوخاري قالديريب وار گوجو ايله هرله يه رک وحشي نين باشينا ائنديردي. آما بو ضربه، دئيه سن، نهنگه او قدر ده کار ائلمه دي؛ چونکي بو هئيبتلي وارليق گئري چکيلمک عوضينه، ائله هئي ايره ليیه دارتينير، قاييغين آلتينا سوخولماق ايسته ييردي.
توقاي آواري تزه دن باشي نين اوستونده فيرلاديب نؤوبتي ضربه ني ائنديرمک ايسته دي و بو آن سانکي مؤعجيزه باش وئردي: وحشي يوخاري توللانيب آوارين اوجونو ائله هاواداجا قاپدي؛ اونون ايري ديشلري نين قيجارديسي، مؤحکم چنه سي نين شاققيلتيسي آيدينجا ائشيديلدي.
توقاي آوارين دستگيندن داها دا مؤحکم ياپيشاراق اونو برک-برک اؤزونه ساري چکدي. ***
دره لرله اوزوآشاغي شوتوين کيچيک داغ چايلاري بيرلشه رک تدريجن گوجلو بير آخينا چئوريليردي. دوزنلره چاتاندا سنگيين گور سولارين باليقلاري دا ائله چايين اؤزو کيمي گئت-گئده بؤيويوردو. آما ايندي سولاريندا اوزدويو بو ايري چاي، ياقوتو ائله ده جلب ائتميردي. دوزدور، ايندي اوزمک خئيلي آسانلاشميشدي؛ آخي هر نئجه اولسا دا، او آرتيق داغ چاييندا دئييل، دوزن بويو باش گؤتوروب گئدن نهنگ بير چايدا اوزوردو؛ باخ بو آنلاردا ياقوت تک بيرجه شئيه گؤره هوسله سورعتيني آرتيرير، يورولمادان ايره لي شوتويوردو؛ آخي دنيزين دوغما- تانيش قوخوسو گئت-گئده ياخينلاشماقدا ايدي . ائله سويون دادينين-تامي نين دييشديگي ده آيدينجا حيسس اولنوردو.
ياقوت کيچيک باليقلارين يانيندان سورعتله شوتويه رک، ايچينده گئت-گئده داها دا گوجلنن بير ايناملا، دنيزه دوغرو اوزوردو. دنيزده ياشايان باليقلارين اؤز نغمه سي واردي. ياقوت دا دنيزه چاتاندان سونرا اؤز نغمه سيني اوخوياجاقدي.
او هله دوزنليک بويو آخان چايين دالغالارينا قوشولوب اوزمکده ايدي. يقين کي، بو چايدا ياشايان باليقلارين دا اؤز نغمه لري واردي. آما ايندي ياقوت چاي باليقلاري نين نغمه سيني ائشيتميردي. اصلينده بو آنلاردا اونون قولاقلاري هئچ نه ائشيتميردي. بيرجه ايستگي واردي: دنيزه تئز چاتماق، سايسيز-حئسابسيز سسلرين ايچيندن دوغما بير سسين "ايزينه دوشمک". او سسين صاحیبيني تاپماق! او دوغما سسين صاحیبي بير واخت ياقوتو باليقچي توروندان، داها دوغروسو، اؤلومون چنگيندن خيلاص ائتميشدي. سونرالار باليق اؤز خيلاصکاري ايله دوستلاشميشدي. ايندي اونون باشقا دوستلاري دا واردي؛ همين دوستلار - قارتال و آلاباش دا ائله اونون کيمي آغير بير سفره چيخميشديلار. اونلار اؤز دوستلاريني - توقايي آختارماق، اگر لازيم گه لرسه اونو دوچار اولدوغو فلاکتين پنجه سيندن خيلاص ائتمک نيیتينده ايديلر.
دنيزين دوزلو، دوغما سويونون عطري ياخينليقدا حيسس اولوندوقجا باليغين اورگي ريققتله، هيجانلا دؤيونوردو. بير آزدان او، اؤز نغمه سيني اوخوياجاقدي! اونون اوزاق و ياخين دوستلاري دا آغيز-آغيزا وئريب خورلا او نغمه ني اوخوياجاقديلار. ايندي ايسه...
ائهئي، دوغما دنيز، آنا دنيز، اوکئانين بالاسي دنيز، آچ قوجاغيني، من گليرم! من اؤز دوستومو آختاريرام. ايندي اونون يولونو گؤزله ينلر چوخدور. قارتاللا آلاباش دا اونون آختاريشيندادير. بيز اؤز دوستوموزو خيلاص ائتمه ليیيک، مئهريبان دنيز! آخي او دا واختيله بيزي خيلاص ائديب. قوي سنين دالغالارين اونون سسيني منه يئتيرسين. من اونون سسيني بوتون سسلرين ايچيندن آييرد ائديب تانييارام. ائهئي، آنا دنيز، دوغما دنيز!.. ايندي سنين شور سويونون عطريني من دويماقدايام... ائشيديرسنمي مني، دوغما دنيز، آنا دنيز، اوکئانين بالاسي دنيز؟...
گئت-گئده داها دا گورلاشان سويوق سولار ايليق سولارا قوووشدو؛ سانکي دنيز ياقوتو قوينونا آلدي. اولجه باليغين قولاقلاري گويولدمه يه باشلادي، آغزي نين تامي دييشدي. آما سونرا هر شئي قايداسينا دوشدو: او ايندي اؤزونو تانيش، ايليق سولاردا راحات حيسس ائديردي.
بير آزدان سولاردان قوپوب گلن دوغما نغمه لرين صداسي ائشيديلدي.
دنيز اؤز قوينونو ياقوتا آچميشدي.
***
آلاباشين اولارتيسي قاياليقلاردا عکس-صدا وئردي.
گئجه ايدي.
آي هله ده دالغالارين قوينوندا يويونوردو. قايوت قاياليقلاردان چيخيب قوملو ساحيل بويو ايره ليله مه يه باشلادي. او، دنيزين، قاياليقلارين، قوملارين، يوسونون، باليققولاقلاري نين، ياخينليقداکي مئشه نين، دنيزده کي باليقلارين، بير سؤزله، اطرافدا اولان هر شئيين قوخوسونو دويور، حيسس ائديردي. آما او تکجه اؤز دوستونون - توقايين عطريني آلا بيلميردي کي، بيلميردي.
بيردن اونون بورنونا کثيف، چورونتو قاريشيق بير ايي گلدي. ديقتله اطرافا گؤز گزديردي. بو آغير قوخو هارادانسا لاپ ياخينليقدان، دنيزله ساحيلين کسيشديگي يئردن گليردي.
آلاباش ائحتيياطلا، آستا آدديملارلا ايي گلن طرفه دوغرو گئتدي. ساحيلده- دالغالارين يودوغو قوملارين اوستونده بير اينسان اوزانميشدي. همين آدامين الينده زوربا بير آغاج واردي و او آغاجدان برک-برک ياپيشميشدي.
قايوت اؤزونو اوزانميش آدامين اوستونه آتدي. بو، بلکه ائله توقاي ايدي؟ يوخ... او، ديققتله قوملوقداکي آدامين اوز-گؤزونه باخدي. تانيدي. ايت همين آدامي نه واختسا توقايين يانيندا گؤرموشدو. بو، ياشلي، زهملي بير کيشي ايدي. کيشي نين قوخوسو او واختدان آلاباشين بورنوندا قالميشدي. آما ايندي همين قوخودان اثر-علامت يوخ ايدي. اطرافي آغير، کثيف، کسکين بير ايي بوروموشدو.
ايت باشيني بولايا-بولايا يئره اوزانميش کيشيدن آرالاندي. او، سؤوق-طبيعي حيسس ائديردي کي، توقاي هاراداسا بو ياخينلاردا اولماليدير. آخي او، دنيزه يقين کي، بو زهملي، قوجا کيشي ايله بيرليکده چيخميشدي!
البتته، آلاباش اؤز صاحیبيني بو گؤرکمده، يئره اوزانميش وضعيتده گؤرمک ايستميردي. او ايسته ييردي کي، توقاي اونو يئنه اؤز آدي ايله چاغيراراق " قايوت!" - دئيه، سسلسين، سونرا اَييليب باشينا سيغال چکسين، هله بير-ايکي خوش سؤز ده دئسين. آلاباش اونون دئديکلري نين معناسيني دوز-عمللي آنلاماسا دا، عادتن، دوستونون اوز-گؤزونون ايفاده سيندن اونون اووقاتي نين نئجه اولدوغونو اعلا آنلاييردي. ايت حَيَطده کي دوستلاري نين، قارتاللا باليغين، احواليني دا هميشه آسانليقلا موعينلشديرردي. آنا ايله قونشو قيزين، يعني شهلانين دا کئفي نين نئجه اولدوغونو هاميدان اول آلاباش بيلردي. آما آنانين غضبلي واختلاريندا قايوت چاليشاردي کي، گؤزه چوخ چارپماسين. چونکي بئله چاغلاريندا آنا يا اونون اوستونه قيشقيرار، يا دا الينه گؤتوردويو سوپورگه ايله اونو هده له ييب بوستانا قوواردي. آما ايندييه جن نه آنا، نه شهلا، نه ده توقاي اونا هئچ چيرتما بئله وورماميشديلار. اصلينده آلاباش اؤزو ده اونلارا بئله بير ايمکاني وئرمه ميشدي. ايت اولاندا نه اولار کي؟ او اؤز حرکتلري نين يئريني ياخشي بيليردي. قونشوداکي آداملارين چوخو اؤز حَيَط-باجاداکي ايتلرينه قايوتو اؤرنک گؤستررديلر. او آز قالا هامي نين سئويمليسي اولموشدو.
ايت غفيلدن آياق ساخلادي. اونون بورنو تانيش بير قوخونو آلميشدي. بو، توقايين قوخوسو ايدي! آلاباش سهو ائده بيلمزدي. کؤپک وار گوجونو توپلاييب ايره لي آتيلدي!
ايندي هئچ بير قوووه قايوتون قارشيسيني کسه بيلمزدي.
ايت اوجادان هورمه يه، سونراسا اوزون-اوزادي اولاماغا باشلادي. جاواب گلمه دي. اولسون کي، ايندي توقاي ائله ده ياخيندا دئييلدي. آما هر حالدا، او، ساغ-سالامات ايدي! قايوت بونا امين ايدي. آلاباش اؤز خيلاصکاري نين قوخوسونو آلميشدي.
ايت سورعتيني داها دا آرتيردي.
***
چوخدان آيريلديغي انگينليک، اطرافيندان اوچوب گئدن سئيرک بولودلار، آچيق-ماوي گؤيلر قارتالين قوش يادداشيني سيلکله ييب اوياتسا دا، اونون بوتون ديققتي اوزاقلاردا ايدي. او، بو آنلاردا سونسوز سمانين قوجاغيندا اؤزونو نه قدر يونگول حيسس ائتسه بئله، ايچينده بير آغيرليق واردي؛ سانکي اورگيندن داش آسيلميشدي؛ آخي اونون دوستو ائوه دؤنمه ميشدي. يقين کي، توقاي دارا دوشموشدو. قارتال ايندي اؤز خيلاصکاريني خيلاص ائتمک اوچون اوزون بير يول قطع ائتمکده يدي.
قارتالين اورگيندن آخيب گئدن حسساس "دالغالار" آرابير اونو ائله گؤي اوزوندجه آني اولاراق قاناد ساخلاييب اطرافا گؤز گزديرمه يه وادار ائديردي. ايندي آيقوت اؤز جانيندا قاغاييلارين، قارغالارين، سرچه لرين، حتّی، نهنگ دنيز هئيوانلاري نين "دالغاسيني" حيسس ائديردي. بو آنلاردا تکجه توقايين "دالغاسي" يئتيشميردي اونا. اوللر او توقايين ائوه گليشيني ايره ليجه دن بيلر، قانادلاريني گئن-گئن آچيب حَيَط بويو سوزر، حتّی هردن قيي چکيب آناني ديکسينديرردي. بو زامان حيرصله نيب اؤزوندن چيخان آنا سوپورگه ايله قارتالي کنارا قووار، هيککه لي-هيککه لي دئيينردي...
اوزاقلاردان ائشيديلن سسلرين خفيف دالغالاري سانکي اونو اؤز عالميندن آييردي، اورگيني ريققته گتيردي. سس گلن سمته ساري اوچماغا باشلادي. اؤز دوغمالاريني اوزاقدان تانيدي: بونلار قارتاللار ايميش کي! سما جنگاورلري... آتا و آنا قارتال اؤز بالالارينا اوچماغي اؤيره ديرديلر. واليدئينلر اؤز اؤولادلارينا-کيچيجيک قوشلارا جيدد-جهدله قاناد آچماغين، هوجوم ائتمگين، مودافيعه اولونماغين سيرلريني باشا ساليرديلار.
آيقوتون قوش يادداشيندا بير آنليغا اؤزونون کؤرپه، اتجه بالا اولدوغو واختلار جانلاندي. بير واخت اونا دا باخ بئلجه قاناد آچماغي، اوچماغي اؤيرتميشديلر. آتا و آناسي اونو- بالاجا قوشجوغازي، آز قالا اؤز قانادلاري اوسته آلاراق آتيب-توتار، شنلنرديلر. آرابير واليدئينلري اونو بوش فضادا تنها قويوب مووققتي اولاراق کنارا چکيلر، اؤز بالالاري نين اوچوشونا اوزاقدان باخارديلار. بئله حاللاردا اونون- کؤرپه قارتالين اورگي هيجانلا دؤيونردي؛ اونا ائله گه لردي کي، باخ اينديجه مووازينتيني ساخلايا بيلمه ييب اوزوآشاغي شيغيياجاق، داش پارچاسي کيمي يئره دوشوب پارچا-پارچا اولاجاق. او آنلاردا اونون آياقلاري اسر، بوغازي قوروياردي. حتّی او، قورخودان گؤزلريني يوماردي. آما بو حال اوزون چکمزدي: آتا و آنا بير گؤز قيرپيميندا اتجه بالانين باشي نين اوستونو کسديرر، اونو تزه دن اؤز گوجلو قانادلاري اوسته آليب سوزر، قاناد-قانادا وئريب دؤوره وورار، قيي چکرديلر.
او، سونرالار تک-تنها اوچماغا آليشدي... ائله اووا دا تک گئتمگي سئويردي. اوجا داغلار، قايالارين شيش ذيروه سي، آچيق سما اونون اورکدن سئويب راحاتليق تاپديغي يئرلر ايدي. او، يوکسکليکلرين دلي-ديوانه سي ايدي! سانکي تانري سماني محض اونون اوچون ياراتميشدي. او، سون واختلار توقايا پناه آپارميشدي؛ آما بونونلا بئله، يئنه ده فورصت تاپان کيمي انگينليکلره باش ووروردو و يقين کي، زاماني چاتاندا او، گونلرين بير گونو ائله سمادا دا اؤله جکدي...
او، ساحيلله دنيزين کسيشديگي خط بويونجا اوچوردو. گئنيش سمادان، اوجا يوکسکليکدن تورپاقلا سويون تماسينا باخماق نئجه ده گؤزل ايدي. او اوللر ده بو ايستيقامتده چوخ اوچموشدو. آما او زامانلار دنيزله ساحيلين بو جور قول-بويون اولماسي نين فرقينه وارماميشدي؛ اونلار، يعني دنيزله ساحيل، بير-بيرينه نئجه ده ياراشيرميش! قيرچين دالغالار کهربا قوملوقلاري اؤپه رک گئري چکيلير، سانکي دنيزين قوينوندا آزاجيق دينجله رک، تزه دن ايره لي شوتويوردو. هر يئني جهد - يئني بير اؤپوش ايدي!
بيردن آيقوتون ايتي گؤزلري آشاغيداکي قارالتييا سانجيلدي. قانادلاريني يانلارينا سيخيب يئره ساري ائنمه يه باشلادي. دئيه سن، ساحيلله دنيزين بيرلشديگي يئرده کيمسه اوزانميشدي. قارتالين اورگي شيددتله دؤيونمه يه باشلادي: بيردن... يوخ... بو، مومکون دئييلدي! اونون خيلاصکاري هئچ کسه بئله آسانليقلا تسليم اولا بيلمزدي!
قارتال قارالتييا ياخينلاشدي. قوملوغا اوزانميش، آياقلاريني دنيزين خفيف لپه لري دؤين آدامين صيفتي اونا بير قدر تانيش گلسه ده، قطعي امين اولدو کي، بو، توقاي دئييلدير!
او، قيي چکيب قانادلاريني گئنيش آچدي.
اورگيندن غريبه "دالغالار" اؤتوب کئچمه يه باشلادي.
بلکه توقاي ياخيندا ايدي؟
قارتال سورعتيني آرتيردي.
***
آخشام دوشموشدو.
حَيَطه آغير بير سوکوت چؤکموشدو.
گؤزو يوللاردا قالان آنا آغلاييب-سيزلاماقدان اوزولوب اؤز اوتاقينا چکيلميشدي.
آنانين يانيندا اؤزونو شوخ توتماغا چاليشان، دئييب-گولن شهلانين اورگي بو آنلاردا کدرين آغير منگنه سينده ازيليردي. قيز فيکيرلشنده کي، بير داها توقايي گؤرمه يه بيلر، دهشته گليردي.
توقايين " دوستلاري نين" - قارتالين، آلاباشين و باليغين غفلتن باش گؤتوروب گئتمه سي ده قيزي بير ياندان تاثيرلنديرميشدي. ايندي حَيَط سويو سوورولموش دييرماني خاطيرلاديردي.
قيزين گؤزلري اؤنونده توقايين صورتي جانلاندي.
جمعي بير نئچه گون اؤنجه آخشاموستو حَيَطه گليب آناني سسله ين شهلاني توقاي اؤزو قارشيلاميشدي. آنا قونشويا گئديبميش. اوغلان داروازانين اؤنونده دايانميشدي. سون واختلار آز-آز گؤزه دين توقاي بو قيسا زاماندا نئجه ده دييشميش، بؤيويوب کيشيلشميشدي؛ اوجابوي، قدد-قامتلي اوغلانلا اوز-اوزه گلن قيز، ندنسه بير آنليغا چاشسا دا، تئز اؤزونو اله آلدي؛ او، اوغلانلا سالاملاشدي و ائله تئز-تله سيک ده خوداحافيظلشدي. بو واخت توقاي ايره لي گليب ديققتله قيزين اوزونه باخدي؛ سانکي شهلاني ايلک دفعه ايدي کي، گؤروردو. آخشام آلاتورانيندا قيزين ظريف بوينونداکي ظريف اينجيلر- بويونباغي دنه لري پار-پار يانيردي؛ بو، يقين کي، قيزا اؤز ننه سيندن قالان ان قييمتلي ياديگار ايدي. شهلا ديکسينيب گئري چکيلدي، دؤنوب قاپيدان چيخماق ايسته دي. بو واخت هئچ بير کسين، ان چوخ دا قيزين، عاقلينا گلمه يه ن بير مؤعجيزه باش وئردي: باياقدان سانکي آغيزلارينا سو آليب سوسان دوستلار - قارتاللا آلاباش سس-سسه وئريب هاراي-هشير قوپارديلار. شهلا اوچون ان ماراقليسي بو ايدي کي، حوووضداکي باليق دا يوخارييا ساري توللانيب غريبه سسلر چيخارماغا باشلادي. گؤره سن، نه اولموشدو بونلارا؟
"دوستلار"ي نين ايستگيني توقاي اؤزو آچيقلادي:
- باخ، بونلار دا سنين گئتمگينه اعتيراض ائديرلر. اگر ايندي سؤزه باخماييب گئري قاييتسان، دوستلاريم باشقا تدبيرلر ده گؤره بيلرلر.
شهلا غئيري-ايختيياري سوروشدو:
- نه تدبير؟
توقاي گولوب دئدي:
- مثلا، اعتيراض نوماييشي کئچيررلر.
توقايين ظارافاتيانا دئديگي بو سؤزه هر ايکيسي گولدو.
شهلا تزه دن گئري دؤندو.
" دوستلار" قيزين آياق ساخلاديغيني گؤروب سوسدولار. سانکي قورباغا گؤلونه داش آتيلدي؛ هر طرفه سوکوت چؤکدو.
توقايلا شهلا ال-اله توتوب حوووضا ياخينلاشديلار. تئزليکله "دوستلار" دا حوووضون اطرافينا جم اولدولار.
آنا قونشودان قاييديب گلنده آي دوغموشدو. آنا اوزونو گؤيه توتوب دئدي:
- ائي يئرين-گؤيون صاحیبي، سن منيم بالالاريمي خوشبخت ائله!
گؤره سن، آنا "بالالاريم" دئيرکن کيمي نظرده توتموشدو؟ آخي اونون جمعي بير بالاسي واردي. قيزين اورگي آتلاندي...
ايندي او خوش آنلار آرخادا قالميشدي. توقايين خبر-اترسيز يوخا چيخماسي آنا کيمي قيزي دا کدرلنديريردي...
شهلا باشيني قالديريب گؤيه باخدي. ايندي آي گؤرونموردو. شهلا پيچيلدادي:
- اي گؤزل آي، سن نييه گؤرونمورسن؟...
نه اوچون گيزلنميسن؟
اوزونو گؤسترسنه...
نورونو دنيزه يايسانا...
قوي، توقاي سني گؤرسون؛
سن اونون قاييغينا يول گؤستر!
سن اونون اوزونو نورا غرق ائله!
سن اونون دوستلاريني حيفظ ائله!
سن اونون آناسينا رحم ائله!
سن منيم کدريمي قهر ائله!
نييه گؤرونمورسن، آي تنها آي؟..
اوزونو گؤسترسنه...
سانکي گؤيلر شهلانين پيچيلتيسيني ائشيتدي. غفيلدن آي گؤروندو، گؤي اوزو نورا غرق اولدو.
شهلا باخيب گؤردو کي، آي حوووضدا چيمير. گؤيلر گؤزه لي ايندي آيدان داها چوخ سودا يويونان شاهانه، قنيرسيز سو پريسينه اوخشاييردي. قيز اَييليب حوووضا باخدي: اورادان آيلا ياناشي آيوزلو بير قيز دا بويلانيردي. شهلا اؤز عکسيني سودا گؤروب ديکسيندي.
بو واخت آنا قاپي نين آغزيندا گؤروندو. آنا اللريني گؤيه آچيب دوداقالتي دوعا ئتمه يه باشلادي. شهلا امين ايدي کي، گؤيلر آنانين سسيني ائشيدير.
***
قيزميش نهنگ ايره لي سوخولوب آواري اونون اليندن قاپماق ايسته ييردي. سؤز يوخ کي، بو غضبلي وحشي، دنيز جاناواري ايدي. توقاي، البتته، اوللر دنيزده اوزاقدان دا اولسا آکولا گؤرموشدو. آما بو، اونون ايندييه جن گؤردويو دنيز جاناوارلاريندان هئچ بيرينه بنزه ميردي. چونکي، اولا، توقايا معلوم ايدي کي، آکولالارين بوينو ايله بدني آز قالا عيني اؤلچوده، عيني بيچيمده اولور؛ غفيلدن ظوهور ائتميش وحشينينسه بوينو اوزونسوو ايدي. ديگر طرفدنسه، باليقچي قاييقلاريني گؤرن آکولالار، عادتن، سؤوق-طبيعي اولاراق جانلاريني اينسانلار طرفيندن تؤره ديله بيله جک هر هانس خطا-بلادان قورتارماق اوچون آرادان چيخماغا اوستونلوک وئرر، سويون درينليکلرينه چکيليب گئدرديلر. آکولالارين هانسيسا نؤوونه عاييد اولان بو هئيوره نينسه، دئيه سن، هئچ بير يانا گئتمک نيیتي يوخدو.
توقاي دؤيوشاراسي فاصيله زاماني چاغيريلماميش قوناغي گؤزالتي سوزدو: آکولانين ساري-بوزومتول بئلي نين دوز اورتاسيندا قيلينجي خاطيرلادان سيوري قاناد واردي؛ وحشي نين قارني نين يان طرفينده ده همين "قيلينجابنزر" قانادلارين ايتي اوجلاري پاريلداييردي. آکولانين ميشار کيمي ايتي ديشلري، ائنلي چنه سي، زهملي گؤزلري، مؤحکم قويروغو اونو باليقدان داها چوخ، دوشمن اوستونه هوجوما کئچميش ياراقلي-ياساقلي دؤيوشچويه بنزه ديردي. سو ييرتيجيسي نين حرکتلري او قدر اؤلچولو-بيچيلي ايدي کي، حتّی، توقاي اؤزلوگونده بير خئيلي ترددود ائتمه لي اولدو: گؤره سن، بو "دؤيوشچو" - آکولايا نه لازيم ايدي؟ آوار؟ قاييق؟ يوخسا توقاي؟
ئله بيل مين ايللرين دوشمنلري ايندي غفيلدن بو سونسوز سو صحراسيندا اوز-اوزه گلميشديلر. آخي بو ياراماز، ييرتيجي وحشي، اوندان نييه ال چکمک ايسته ميردي؟ مگر بو انگين دنيزين قوينوندا يئم الده ائتمک اونونچون بو قدر چتين ايدي؟ بلکه باليقلارلا آداملار آراسيندا، سببي توقايا معلوم اولمايان قديم، گيزلي بير دوشمنچيليک تاريخي واردي؟ بلکه لاپ ائله توقايين تانيديغي باليقچيلاردان هانسيسا، هاچانسا بو ظاليم بالاسي نين اؤولاديني و يا آناسيني اوولاييب؟ بلکه ده وحشي، سادجه اولاراق، اوز-اوزه گلديگي بو قريب قوناغا اؤز گوجونو گؤسترمک ايسته ييردي؟... آخي، هر نئجه اولسا دا بورالار اونون - آکولانين اؤز وطني ايدي. توقايينسا وطني ايندي اوزاقلاردا قالميش ساحيل - بؤيوک تورپاق ايدي.
غضبدن اوغلانين ديشي باغيرساغيني کسيردي.
بير ياندان دا سوسوزلوق... توقاي سو قابي نين ديبينده کي سودان بير-ايکي قورتوم آليب آزاجيق نفس دردي. سانکي بير قدر يونگوللشيب آوارين دستگيني تزه دن سينه سينه سيخدي.
ييرتيجي نين ايتي ديشلري شاققيلداياندا توقايين جانيندان سويوق دالغالار کئچدي. اونون قانچيرلاميش ائنلي کورگيندن، عضله لي بويون-بوغازيدان شور دنيز سويونا قاريشميش تر داملالاري آخيردي.
دئيه سن، دنيز جاناواري اوندان قطعييين ال چکمک نيتينده دئييلدي.
ايندي توقاي بيرجه شئيدن تسکينليک تاپيردي کي، آرتيق بوز-چهرايي " تول"ه بورونموش ساحيل قيسمن ده اولسا گؤرونمه يه باشلاميشدي. آما او، ياخشي آنلاييردي کي، تک بير آوارلا لازيم اولان ايستيقامته اوزمک مومکون دئييل...
باشينا ده ين ضربه لر دنيز جاناواريني داها دا هيددتلنديرميشدي. او، قاييغين اطرافيندا فيرلانيب مانئور ائدير، سانکي ايره لي آتيلماق اوچون اؤزونه الوئريشلي مؤوقع سئچيردي. وحشي نين گؤزلرينده ايلان کيمي قيوريلان سونسوز غضب آچيقجا حيسس اولونوردو.
توقاي، البتته، ايندييه جن تجروبه لي باليقچيلاردان آکولالار حاقيندا موعين شئيلر ائشيتميشدي. ايندي بو غضبلي دنيز حئيواني ايله قارشيلاشان اوغلانين اورگيندن غئيري-ايختيياري غريبه فيکيرلر کئچدي: " دئيه سن، آداملار باليقلاري يئديگي کيمي، باليقلار دا آداملاري يئمه يه جان آتير. آللاه بيلير، بو سونسوز سو صحراسي نين ديبينده نه قدر اينسان جسه دي اويويور؟ هله زامان-زامان باش وئرن فلاکتلي سو باسقينلاري نه قدر حياتا سون قويوب؟..."
توقاي بير زامانلار- هله نئچه ايللر بوندان اؤنجه، اوشاق اولارکن، آناسيندان و قصبه دکي ديگر ياشلي آداملاردان سو باسقينلاري نتيجه سينده سئللرين-سولارين آلتيندا قالان کندلر- شهرلر باره ده آز شئيلر ائشيتمه ميشدي؛ اوغلان نوحون گميسي، دونياني باسان سولارين قوينوندا باتمايان گه مي ايله باغلي سؤيله نيلن افسانه ني ده ايندييه ده ک ياخشي خاطيرلاييردي... دئيه سن، باليقلارلا آداملار بير-بيريلريني ائله ازلدن يا آنلامير، يا دا آنلاماق ايسته ميرديلر. يقين ائله اونا گؤره ده سو و قورو يارانان واختدان بري باليقلارلا اينسانلار آراسيندا آمانسيز موحاريبه گئديردي...
توقايلا آکولا آراسينداکي ايختيلاف دا، گومان کي، طرفلر آراسينداکي کؤهنه دوشمنچيليگين يئني شراييطده داوامي ايدي؛ بو بؤيوک سو سلطنتي نين - دنيزين موعين بير حودودو اولسا دا، اونلارين، يعني اينسانلا باليغين بير-بيرينه اولان نيفرتينين حددي-حودودو يوخ ايدي. دئيه سن، ايندي غفيل فورصت قازانميش ييرتيجي، بوتون باليقلارين قيصاصيني آچيق دنيزده ياخالاديغي بو کؤمکسيز اينساندان آلماق ايسته ييردي.
باخيشلاري تئز-تئز سو حئيواني نين غضبلي گؤزلرينه سانجيلان توقاي اونو دا حيسس ائديردي کي، رقيبي قاييغين ايچينه آتيلماغا تلسمير، داها دوغروسو، هله ليک بونا جورأت ائتميردي. يقين بونون سببي اوندا ايدي کي، آکولا قاييغا آتيلماغين آجي نتيجه سيني سؤوق-طبيعي حيسس ائديردي؛ اورادا اونو گؤزله ين، آرتيق " لذتيني" دادديغي آغير ضربه لر، ايستر-ايسته مز وحشيني احهتيياطلي اولماغا تحريک ائديردي. آما، او، دنيزين قوينوندا راستلاشديغي بئله قييمتلي اووو، قاييقداکي آدامي، يعني بو ياغي دوشمني قطعييين الدن وئرمک نيتينده دئييلدي. آخي سو جاناواري نه واختاجان کيچيک باليقلارلا باشيني قاتمالي ايدي؟.. اونون ايتي ديشلري تزه ات ايسته ييردي. اونون گئنيش، ايري مده سي لذتلي يئم طلب ائديردي. غضبلي آکولا سولارين قوينوندا اصل اووچو کيمي گرديش ائدير، توقايا غفيل ضربه ائنديرمک اوچون الوئريشلي فورصت آختاريردي. وحشي بير-ايکي دفعه قاييغين آلتينا سوخولوب آغير، مؤحکم تاختالارا گوجلو ضربه لر ائنديرميشدي. لنگر ووران قاييغين مووازينتيني تک آوارلا ساخلاماق چتين اولسا دا، توقاي بونا بيرتهر مووففق اولموشدو. بو آنلاردا قاييغين آشماسي و يا اونون اؤزونون بودره ييب سويا ييخيلماسي هر شئيين سونو دئمک ايدي. بونا گؤره ده او، هر وجهله اؤزونون و قاييغين مووازينتيني قورويوب ساخلاماغا چاليشيردي.
وحشي آرابير ديشلريني شاققيلداداراق گؤزله نيلمز هوجوم " تاکتيکاسي " سئچير، آچيق-آشکار، نوماييشکارانه بير شکيلده توقايي ازمک اوچون يئني-يئني اوصوللارا ال آتيردي؛ او قيجيق دوغوران حرکتي ایله سانکي اؤز دوشمنينه هم مئيدان اوخويور، هم ده تضييق گؤستريردي.
آکولا ايله گؤز-گؤزه قاليب ايتي، داواملي باخيشلارلا اونو آلتدان-آلتدان سوزن توقاي، هردن آز قالا آجي-آجي گولمک ايسته ييردي: وحشي، بو آنلاردا اؤزونو سو حئيوانيندان داها چوخ، هيککه لي، دالاشقان دنيزچيلر کيمي آپاريردي. آما نه ائدسن کي، اونونلا قانلي دؤيوشه گيرن بو هئيبتلي جانلي، آدام دئييل، سو جاناواري ايدي. گؤرونور، سو سلطنتي نين ده، قوروداکي کيمي، اؤز تکببورلو آغالاري اولور.
توقاي سهو ائتمکدن قورخوردو. اونا گؤره ده هر احتيمالا قارشي آواري الينده حاضير وضعيتده ساخلاماغا چاليشيردي؛ او، ضربه يه ضربه، هوجوما هوجوملا جاواب وئرمک ايسته ييردي. بئله آنلاردا يالنيز تله سيک قرار چيخارانلار، تمکينيني ايتيرنلر اودوزا بيلردي.
توقايين آرتيق خئيلي باليقچيليق تجروبه سي واردي. او ياشلي باليقچي دوستلاريندان دنيز جاناوارلاري نين اؤز دوشمنلرينه و ائلجه ده، آداملارين دنيز ييرتيجيلارينا قارشي هانسي هوجوم فندلريني ايشلتمه لري باره ده آز ائشيتمه ميشدي. اونون حتّی باليقچيلارين ايتي اوجلو نيزه ايله آکولاني نئجه اوولامالاري باره ده معلوماتي دا واردي. آما آچيق دنيزده وحشي ايله ايلک دفعه ايدي کي، بئله اوز-اوزه، گؤز-گؤزه گليردي.
توقاي تک آوارلا، آز قالا يالين الله، ووروشماغين چتينليگيني آنلاسا دا، دوشدويو بلادان خيلاص اولماغين يولونو هله اؤزو اوچون تام آيدينليغي ايله تصوورائده بيلميردي. او سارسيلميشدي. او خيلاص يولو آراييردي.
سانکي بو آنلاردا ايچيندن وولکان کيمي پوسکورن ظولمتي غضب و هيککه دولو گؤزلري ايله آنلادان بو عجایيب مخلوق دا اؤز دوشمني نين اورگيندن کئچنلري دويوب آنلايير و بلکه ده بونا گؤره نؤوبتي هوجوما حاضيرلاشير، اؤزونه الوئريشلي مؤوقع سئچمه يه چاليشيردي.
آما توقاي بو سولار سلطنتي نين ييرتيجي آغاسينا هئچ ده آسانليقلا تسليم اولماق نيتينده دئييلدي.
***
او اؤزونو گؤز ياشلاري کيمي شففاف، دورو چايدا يوخ، سويو شور اولان دنيزين قوينوندا داها راحات، آزاد و يونگول حيسس ائديردي. آما بونو دا ياخشي بيليردي کي، حتّی قوينوندا ياشاديغي او دنيز بئله، اونا تام دوغما دئييل. چونکي ياقوت دونيايا اوکئاندا گؤز آچميشدي. اونو تصادوفلر گتيريب دنيزين قوينونا آتميشدي. او هئچ ده کورودن تؤره ميش دنيز باليغي دئييلدي. مسله بوراسيندادير کي، کورودن عمله گلن باليقلارين سونرادان نه آناسي معلوم اولاردي، نه ده آتاسي. آما او اؤز دوغما آناسيني ياخشي تانيييردي: اونو دوغان، اونون قايغيسيني چکن آناني! آنا باليق اونو دونيايا گتيرندن سونرا بير چوخ باشقا آنالار کيمي هاراياسا چکيليب غئيب اولماميشدي. آنا اؤز بالاسينا بؤيوک اوکئاندا اوزمک اؤيرتميشدي. آنا اونا ييرتيجي اوکئان باليقلاري نين غفيل هوجوموندان نئجه يايينماغين، سوآلتي سلطنتده نئجه گيزلنمگين يولونو دا باشا سالميشدي!
ياقوت هله کؤرپه ليکدن دجل ايدي. آناسيندان خلوت سوالتي قايالارين دلمه-دئشيکلرينه باش وورار، يوسونلارين ايچينده گيزلنردي. غريبه بوراسي ايدي کي، او نه قدر اوزاقلارا اوزوب گئتسه ده، آنا اؤز کؤرپه سيني بؤيوک اوکئانين سونسوز سولاريندا آسانليقلا آختاريب تاپاردي. ائله ياقوتون اؤزو ده ايسته ديگي واخت اوزوب آناسي نين يانينا گئدر، اونون گوجلو قانادلاري آلتينا سيغيناردي. بير آز بؤيويندن سونرا اوکئانين سونسوزلوغو سانکي اونو بئزديردي. او گونلرين بير گونو ياخينليقدا اوزن "دمير باليغين" - کؤهنه گه مي نين قانادلاري آلتيندا گيزله نيب اوزاق، اوزاق، چوخ اوزاق بير سفره چيخدي. کؤهنه گه مي اونو بو شور سولو دنيزين قوينونا گتيريب چيخارتدي. او اول-اول ياد دنيزده داريخسا دا، اؤز آناسي اوچون، اوکئان اوچون غريبسسه ده، گئت-گئده بو اؤگئي سولارا آليشماغا باشلادي. حتّی، حيسس ائتدي کي، دنيز بعضي جهتلرينه گؤره اوکئاندان اوستوندور. ايش بوراسيندا ايدي کي، ياقوت اوکئاندا کيچيک باليقلاردان بيري حئساب اولونوردو. اورانين- اوکئانين ييرتيجي باليقلاري، نهنگ بالينالاري واردي. آما او، بورادا - دنيزده، ساييلان-سئچيلن باليقلاردان بيري ايدي. و يقين کي، او بو دنيزده ياشايان يئگانه اوکئان باليغي ايدي. ياقوت بورادا حتّی ييرتيجي دنيز باليقلاري نين اونون يانيندان ائحتيياطلا اؤتوب کئچديکلريني ده آيدينجا حيسس ائديردي. اونون بدني نين شففاف-گوموشو رنگي سو آلتيندا چوخلاريني جلب ائتسه ده، جورأتله نيب باشقا فيکره دوشنلره تصادوف اولونموردو. چوخ گومان کي، دنيز حئيوانلاري دا دونيانين بوتون جانليلاري کيمي سيناقدان، تجروبه دن کئچمه يه ن بير ايشه باش قوشماغا هلم-هلم جورأت ائتميرديلر.
آرابير ياقوت بير واخت قانادلارينا سيغينيب اوزون يولا چيخديغي گميني بو سولاردا يئنه گؤروردو. يقين کي، قوجاليب الدن دوشموش بو بوزومتول گمي نين بير داها اوکئانا قاييتماق شانسي قالماميشدي؛ آخي اوکئاندا عادتن، گوجلو، مؤحکم، جاوان، قاسيرغايا-توفانا سينه گرن گميلر اوزوردو. بو گمينينسه رنگي قاچميشدي؛ بير واختلار ياقوتا بلدچيليک ائتميش او "دمير باليق "سون واختلار تئز-تئز تعميره دايانير، سونرا يئده يه آلينيب داخيلي سولاردا اوزمک اوچون تزه دن دنيزين قوينونا آتيليردي.
ياقوت "اؤز گميسيني" اوزاقدان تانيييردي. اصلينده اونو تانيماغا ئله خوصوصي ائحتيياج دا يوخ ايدي. چونکي کؤهنه گمي نين موحرريکي نين بوغوق سسيني سوالتي "دالغالار" اطرافا ياييردي. ياقوتون حسساس قولاغي همين "دالغالاري" ائله همين آنداجا قبول ائديردي. او ندنسه قوجاليب الدن دوشموش گميني اؤزونه چوخ محرم، دوغما بيليردي. آخي ياقوت محض بو گمي نين قانادلارينا سيغينيب اوکئاندان دنيزجن اوزون بير يول قطع ائتميشدي.
بير واخت باليق يوخودا تئز-تئز بؤيوک، نهنگ بير سو حؤوضه سي گؤرردي: بورالار اونون وطني ايدي. او، اؤزونون شيپشيرين دنيز يوخوسوندان اويانيب ديک آتيلار، سويون اوزونه چيخيب اوزاقلارا باخاردي. آما اوکئانا گئدن يول اوزاق، چوخ اوزاق، هم ده تهلوکه لي ايدي. او، يولدا ييرتيجيلارا توش گله بيلردي. بورادا - دنيزده ايسه اونونلا هئچ کسين هئچ بير ايشي يوخدو. بورالار سويونون باليغينا بنزمه ديگينه گؤره حتّی چوخلاري اوندان ائحتيياط ائديردي.ياقوتون بيچاق کيمي ايتي قانادلاري، پار-پار يانان گوموشو دريسي دنيزده کي اکثر باليقلارين اورگيني سکسکه يه ساليردي. سويون آلتيندا اونونلا اوز-اوزه گلن ايري، وحشي باليقلار بئله، چوخ واخت قورخوب حرکت ايستيقامتلريني دييشيرديلر؛ هئچ کس لووغاليق اوجباتيندان گودازا گئتمک ايستميردي. اصلينده ايسه، ياقوتون هئچ کسله ووروشماق نيیتي اولمازدي. او، بو شور سولارين قوينوندا سربست، آزاد ياشاماق ايسته ييردي. آما، گؤرونور، آزادليغين دا اؤز عؤمرو و اؤز حودودو اولور. ياقوت گونلرين بير گونو باليقچي تورونا دوشوب، اؤلوم تهلوکه سي ايله اوز-اوزه قالدي. خوش بير تصادوف اونو باليقچي توروندان خيلاص ائتدي. گنج باليقچي قوجا باليقچيني ديله توتوب گوموشو گؤزه لي اونون اليندن آلدي، باليغين سوروشکن بدنينه سيغال چکيب اونو ائحتيياطلا قاييغين دؤشمه سينه اوزاتدي؛ ائوه گتيريب حوووضداکي سويون ايچينه بوراخدي. حتّی خيلاصکاري اونا سونرالار گؤزل بير آد دا وئردي: ياقوت! ايندي مودهيش بير فاجيعه باش وئرميشدي: اونون خيلاصکاري دنيزه نؤوبتي سفردن قاييتماميشدي.
بودور، آرتيق ياقوت دنيزده دير!
اوزاقدا- سويون آلتيندا قورولان ايري تور، باليغين نظريندن قاچمادي. آما او، آرتيق اولکي سادلؤوح، تجروبه سيز باليق دئييلدي. ايندي او، عاقيللي، ائحتيياطلي ياقوت ايدي!
باليق، ايستيقامتيني دييشه رک دوز باليقچي تورونون يانيندان سييريليب کئچدي. حسساس " دالغالارين " چکيب گتيرديگي کوت تاققيلتي سسلري اونو قاناد ساخلاماغا وادار ائتدي؛ سويون تکينده آرخاسي اوسته چئوريليب اطرافا ديققت کسيلدي: ائله بيل کي، هاراداسا گمي، يا دا قاييق ديوارلارينا آرامسيز ضربه لر ائنديريرديلر. ياقوت همين ايستيقامته دوغرو اوزمه يه باشلادي. او آرابير سودان باش چيخاريب هاوايا آتيلير، اوزاقلارا ديققت يئتيريردي. اطرافدا هئچ نه گؤرونمه سه بئله، سويون آلتي و اوستو ايله آخيب گلن حسساس-گؤرونمز " دالغالار " اونو هيجانا گتيريردي!
ياقوت سورعتيني آرتيردي…آخير کي، سويون اوستونده ييرغالانان قارالتي شکيل کيمي اونون گؤزلرينه کؤچدو: بو، قاييق ايدي! او قاييقداکي توقاي ايدي! ياقوت اؤز قناعتينده حاقلي اولدوغونا تاماميله امينليک دويوردو. ايتي گؤزلري، حسساس قولاقلاري، علی الخوصوص دا هيجانلا ووران قاينار اورگي، اونو آلدادا بيلمزدي.
باليق، سويون تکينه باش ووروب سورعتله ايره لي شيغيدي.
ياقوت قارالتييا چاتاندا سورعتيني بير قدر آزالتدي؛ سودا بير قاييق ييرغالانيردي. ايري کؤتويه بنزه ين هئيبتلي سو جاناواري سودان باش قالديراراق قاييغا نؤوبتي ضربه ني ائنديرمه يه فورصت آختاريردي. قاييقداکي ايسه، حقيقتن، توقاي ايدي! اورگي اونو آلداتماميشدي. ياقوت سودان سييريليب فيشنگ کيمي هاوايا آتيلدي. توقاي آني اولاراق يانا چئوريلدي و آز قالا يئريندجه دونوب قالدي؛ او، توتقون سولارين اوستونده سوزه رک برق ووران ياقوتو گؤروب تانيدي! اوغلان حئيرتيني گيزله ده بيلمه ييب اوجادان، هيجانلي- بوغوق سسله قيشقيردي:
- ياقوت!
باليق، بير داها سويا باش ووروب يئنيدن اوزه چيخدي. دئيه سن، آکولا چاش-باش قالميشدي: وحشي، اؤزونون آغاليق ائتديگي سولاردا ايندييه جن بو جور گؤرکمده باليغا راست گلمه ميشدي. دنيز جاناواري ايله اوکئان باليغي بير موددت بورون-بورونا، گؤز-گؤزه دايانيب آغير، سيناييجي طرزده بير-بيرينه باخماغا باشلاديلار. سانکي انگين سو صحراسي نين غضبلي اؤولادلاري اوچون بو آنلاردا زامان دونموشدو و اونلار اطرافداکي هر شئيي، او جومله دن، ياخينليقداکي يئر اؤولاديني - توقايي دا اونوتموشدولار.
آکولانين غضب و نيفرت دولو گؤزلري نين درينليگينه کوکرمه يه حاضيرلاشان قورخونج بير دنيزين واهيمه سي چؤکموشدو.
ياقوت اؤز دوستونون، اؤز خيلاصکاري نين يانيندا هئچ ندن، هئچ کيمدن قورخوب چکينه بيلمزدي.
توقاي آوارين کورگيني سويا ساليب دستگي سورعتله اؤزونه ساري چکدي. قاييق کسکين شکيلده يانا فيرلاندي. دنيزدن قوپان سو دامجيلاري کنارا سيچرادي.
ياقوت ساپاند داشي کيمي گؤيه آتيليب قاييغين ايچينه توللاندي.
- ياقوت! بو، سنسن؟
توقايين ماتي-قوتو قوروموشدو. اوغلان اَييليب ديقتله باليغين گؤزلرينه باخدي.
دوغرودان دا، ايندي باليغين پار-پار يانان گؤزلري اصل ياقوتا بنزه ييردي.
***
ائله بيل کيمسه اونا کناردان گؤز قويوردو. قايوت سورعتيني آزالديب اطرافا بويلانماغا باشلادي. گؤزه هئچ بير اينس-جينس ديميردي.
ساحيل سيخ کوللار و آغاجلارلا اؤرتولموشدو. قايوت هانسيسا سؤوق-طبيعي بير حيسسين تاثيري آلتيندا اؤزونو آغاجلارين آراسينا وئردي. بورا سويوق و نميشليک ايدي. دئيه سن، يئره هئچ گونش شوعالاري دا دوشموردو. آلاباش بوينونون آرخاسيندا ايستي بير هنير دويوب گئري بويلاندي. اوزونه سانجيلميش بير جوت زهملي گؤز اونو چاشديردي. واهيملندي. هورمک ايسته دي. آما ندنسه سسي چيخمادي. سانکي بوغازي قوروموشدو.
اونلارين باخيشلاري يئنه عئيني نؤقطه ده چارپازلاشدي. قايوتون اورگي هيجانلا دؤيوندو؛ غريبه ايدي، آلاباشين اؤزونون ده بير سويومو بو غضبلي گؤزلرين صاحیبينه اوخشاييردي. اونلار خئيلي موددت سيناييجي نظرلرله بير-بيريني سوزدولر. دئيه سن، بو سيخ کوللارين و آغاجلارين صاحیبي چاغيريلماميش قوناغي اؤز اجدادلاريندان هانسيناسا بنزه ديردي. آما آلاباش لنگييه بيلمزدي. ايت يئريندن سيچراييب تزه دن ساحيله ساري گؤتورولدو. حيسس ئتدي کي، آرخادان تعقيب اولونور. سورعتيني داها دا آرتيردي. ائله بيل کي، قايوت ايندي قوملو ساحيلله قاچمير، گؤيون اوزو ايله اوچوردو. آرادا دؤنوب آرخايا باخدي. غضبلي گؤزلرين صاحیبي اونو قووماقدا ايدي.
قايوت قيي سسي ائشيديب آدديملاريني ياواشيتدي. اونا ائله گلدي کي، قولاغي سسه دوشوب. آما تانيش، دوغما سس هله ده اونو تعقيب ائتمکده ايدي. او، آياق ساخلاييب آرخايا دؤندو، اطرافا بويلاندي. گؤزلرينه اينانمادي: آيقوت قانادلاريني چتير کيمي آچيب ايتي، قورخونج گؤزلرين صاحیبي نين باشي اوسته اوچوردو.
قارتال، آرتيق قايوتون اونو گؤردويونو حيسس ائديب، سورعتله آشاغييا دوغرو شيغيدي. باياقدان آلاباشي قاراباقارا قووان وحشي، چاشيب قالميشدي: او، غضبلي-غضبلي اولاييب گؤيه توللاندي - سانکي باشي نين اوستويله اوچان قارتالي هاوادا قاپيب پارچالاماق، بئله ليکله ده، اؤزونون کوکره ين غضب و هيددتيني سؤندورمک ايسته ييردي. قارتال ظارافات ائديرميش کيمي آلاباشي قووان غضب صاحیبي نين دوز بورنونون اوجوندا آتيليب-دوشور، آرابير قيي چکيردي. وحشي لاپ اؤزوندن چيخميشدي. بير اونونلا ظارافات ائدن يئکه خانايا باخ! غضبلنميش وحشي، ندنسه، ايستيقامتيني دييشيب قالين کوللوغا دوغرو گؤتورولدو. دئيه سن، او، قارتالي آلداديب يولوندان دؤندرمک ايسته ييردي. سانکي اونون بو کلگيني باشا دوشمه يه ن آيقوت دا همين ايستيقامته اوچماغا باشلادي. آلاباش چاشيب قالميشدي: ايندي قارتال وحشي نين بئلينه قونموشدو. دئيه سن، آيقوت عاقليني ايتيريب! هئچ بو جور ده ظارافات اولار؟ وحشي اونو پارچالايا بيلردي!
آلاباش حيسس اولونمادان يولونو دييشدي. او، اولاييب وحشيني غضبلنديرمک، دويوق سالماق ايستميردي. بونا گؤره ده يومشاق آدديملارلا قاچيردي؛ او، آيقوتو اؤز يولوندان دؤندرمک ايسته ييردي. کوللوغا چاتهاچاتدا قارتال قانادلاريني گريب قيي ووردو و وحشي نين بئليندن سيچراياراق قايوتا دوغرو ايستيقامت گؤتوردو. غضبلي گؤزلرين قورخونج صاحیبي تزه دن آرخايا دؤنوب اونلارين آردينجا خئيلي قاچسا دا، سونرا ندنسه ائحتيياطلانيب آياق ساخلادي، زينگيلده يه-زينگيلده يه يئنه گئري قاييديب کوللوغا سوخولدو؛ يقين کي، بو يئرلر اونون وطني ايدي.
قارتال هاوادا دؤوره ووروب آلاباشا ساري اوچدو، شن-شن قيي ووروب قايوتون بئلينه قوندو. ايت اوجادان اولادي. اونلارين سسي بير-بيرينه قاريشدي. کؤهنه دوستلار بير-بيريني ياخشي آنلاييردي. ايستي، مئهريبان گؤروشدن سونرا قارتال تزه دن هاوايا قالخدي. آخي، يوکسکليکدن ساحيل ده، دنيز ده اوووج ايچي کيمي آپايدين گؤرونوردو. ايندي آلاباش ساحيلله، قارتالسا گؤيون اوزو ايله تانيش بير عطره، قوخويا دوغرو ايره ليله ييردي...
اوزاقدا، دنيزين قوينوندا ييرغالانان قارالتيني ايلک اولاراق قارتال گؤردو؛ اونون ايتي گؤزلريندن هئچ نه، حتّی کيچيک نؤقطه بئله يايينا بيلمزدي: او قارالتي قاييق ايدي! او قاييقداکي توقاي ايدي! قارتال بونو دا گؤردو کي، توقاي الينده کي آوارلا زيرپي بير دنيز وحشيسيني گئري تپير. قارتال قيي چکدي. آلاباش اؤز دوستونون هيجانيني اونون هاراييندان آنلادي. او دا اوجادان اولاماغا باشلادي. آز سونرا قارتال دنيزين اوستونده قاناد چالماغا باشلادي.
آلاباش قاييغين توشونا چاتاندا قارتال اؤزونو دؤيوش مئيدانينا چاتديرميشدي. قايوت دال آياقلاري اوسته شاهه قالخيب وار گوجو ايله اولاماغا باشلادي.
توقاي غئيري-ايختيياري قيشقيردي:
- آيقو-او-او-اوووت!..
توقاي اونون – اؤز اعتيبارلي دوستونون اولارتيسيني ائشيديب الينده کي آواري يوخاري قالديراراق هاي وئردي:
- قايو-او-او-اوووت!..
ايت گئري-گئري چکيليب بيردن ايره لي آتيلاراق اوخ کيمي هاوايا سيچرادي. سونرا ايره لي شيغيدي. کيچيک دالغالار ايتين سينه سيني يالادي. قايوتون جانيندان سويوق دالغالار اؤتوب کئچدي.
باليق دوستلاريني گؤروب بير گؤز قيرپيميندا قاييقدان دنيزه توللاندي. ايندي ياقوتلا قايوت سودا، آيقوت ايسه هاوادا ايدي. توقاي الينده کي آواري هيجاندان کؤروک کيمي ائنيب-قالخان سينه سينه سيخميشدي.
سانکي يئني گوج و قوووه توپلاميش وحشي، ديشلريني شاققيلداديب ايره لي آتيلدي. اونون باشينا و قويروغونا، هابئله، بئلينده کي ايتي "قيلينج"ا موختليف جيناحلاردان آغير ضربه لر ائنديريلسه ده، وحشي قطعييين گئري چکيلمک ايستميردي.
آرتيق دنيزده قانلي دؤيوش گئديردي...
***
گؤره سن، گؤيلر آنانين سسيني ائشيديرديمي؟
بس دنيز نئجه؟ ائشيديرديمي آناني؟
آنا اؤزونه نه حَيَطده يئر تاپا بيليردي، نه ده ائوده. بو گئن دونيا آنانين باشينا دار گليردي. آنا عذاب-ايشگنجه منگنه سينده سيخيليردي. اونون اورگي آز قالا پارتلاماق درجه سينه گليب چاتميشدي. شهلا بير آن دا اولسون آنانين يانيندان گئتمير، اونو گؤزدن قويموردو. قيز آنايا تئز-تئز تسکينليک وئريردي:
- داريخما، خالا... اؤزونو اوزمه. واللاه، من امينم کي، توقاي تئزليکله ساغ-سالامات ائوه قاييداجاق.
آخير کي، آنا دؤزه بيلمه دي. يير-ييغيش ئديب شهلايا ياخينلاشدي:
- قيزيم، تا من دؤزه بيلميرم. ئوه گؤز-قولاق اول...
- خالا، هارا گئتمک ايسته ييرسن؟- دئيه شهلا تعججوبله آنادان سوروشدو.
- اوغلومو آختارماغا...
- خالا، اوندا من ده سنينله گئديرم.
- سن ائوده قال، قيزيم... بيردن من گئدرم، توقاي غفيلدن گه لر، ائوده مني گؤرمز، ناراحات اولار.
شهلا قلبن اونونلا راضيلاشماسا دا، ايستر-ايسته مز دئييلنلره تابع اولدو؛ آنا گئتدي، قيز قالدي. شهلا آنانين آرخاسينجا بير قاب سو آتدي.
آنا يولو ساپ کيمي الينه آليب دنيزه ساري ايره ليله مه يه باشلادي. اوزاقدان دنيزين اسرارانگيز خيشيلتيسي ائشيديليردي. آنا اورگينده يئنه دنيزه دوعا اوخويور، اونا يالواريردي کي، تک بالاسينا - توقايا قييماسين.

سن ده آناسان، دنيز...
سه نين ده بالالارين وار.
منه يازيغين گلسين، دنيز
قييما منيم توقاييما...

آنا گليب ساحيله چاتدي. دنيزين اوستونده کي قاغاييلار هالاي ووروب سس-سسه وئره رک واهيمه لي سسله قاغيلداشيرديلار؛ يقين کي، بو، سببسيز دئييلدي: عادتن، دنيزده توفان قوپاندا قاغاييلار بو جور عجایيب، واهيمه لي سسلر چيخاريرلار. آنا قه هر ايچينده اطرافا گؤز گزديردي. ساحيل بويو اوزانان ائنسيز يولا چيخدي. بو يول مئشه و ساحيل زولاغي نين کسيشديگي يئرله اوزانيب گئديردي. آزاجيق نميشليک هوپموش قومسالليقدا زورلا سئچيلن حئيوان آياغي نين ايزلري ده آنانين ديققتيندن يايينمادي. آنا اَييليب ظنله ايزلره باخدي.آمان آللاه، بو کي، قايوتون ايزي ايدي! آنا تام امين اولدو کي، آلاباش محض بو يوللا حرکت ائديب. سانکي آنانين دردلي اورگينه بير سرينليک، ساکيتليک چؤکدو. اونون گؤزلري نين ايشيغي، ديزلري نين طاقتي آرتدي. آنا آدديملاري نين سورعتيني آرتيردي.
آرابير آلاباشين لپيرلري ائنسيز يولدان کنارا چيخير، ايت-باتا دوشوردو. آما آنا اؤز يولوندان چيخماق نيیتينده دئييلدي. او، امين ايدي کي، بو يول اونو دوز اوغلونون يانينا آپارير.
يئنيدن آلاباشين ايزينه دوشن آناني سانکي غفيلدن ايلديريم ووردو. ساحيلله دنيزين بيرلشديگي يئرده - نم قوملارين اوستونده حرکتسيز اوزانميش آدامي گؤروب آياق ساخلايان آنانين سينه سيندن دلي بير فرياد قوپدو. نهايت، آنا آغلايا-آغلايا يئره اوزانميش جسه ده ياخينلاشدي. بو، قوجا باليقچي ايدي. دالغالارين ساحيله آتديغي بو قوجا زاوالليني آنا ياخشي تانيييردي؛ توقاي چوخ واخت دنيزه بو کيشي ايله گئدردي. بس گؤره سن توقاي ايندي هارادا ايدي؟ بلکه او دا هاراداسا بو ياخينليقدادير؟ بلکه دالغالار اونو اودموشدو؟ بلکه او دا بو قوجا باليقچي کيمي... آنا فرياد قوپارماغا باشلادي: " توقاي، منيم بالام، هاراداسان؟"... او، آغلاديقجا اللري ايله ديزينه، باشينا ووروردو...
نهايت، آنا اؤزونو اله آلدي. باليقچي نين خيلاص ائديب اؤزو ايله ساحيله چيخارتديغي آواري يئردن گؤتوردو؛ بو، توقايين آواري ايدي. قادين اولجه آغاجي سينه سينه سيخيب اونو اؤپدو، اوخشادي، سونرا آوارين کورک حيصه سي ايله قومسالليغين سينه سينده درين بير يارغان آچدي. گوجونو توپلاياراق قوجا باليقچيني اوستوفچا چکيب همين يارغانا - بو مووققتي مزارا اوزاتدي. اوستونو قوملا اؤرتدو کي، قورد-قوش يئمه سين. دوداقالتي قوجانين روحونا دوعا اوخويوب اللريني گؤيه قالديردي، صالاوات چئويردي. مزارين باش حيصه سينه نيشانه کيمي بير داش پارچاسي قويدو؛ آخي، قبرين يئريني- قوجا باليقچي نين اويودوغو بو بوز قومسالليغي ياددا ساخلاماق لازيم ايدي. آنا اوغلونو تاپيب کنده قاييتديقدا بو " قبر"ين يئريني قوجا باليقچي نين قوهوملارينا بيلديره جک و سؤز يوخ کي، تئزليکله، ايندي قوملارين آلتيندا اويويان بو جسد عومومي قبريستانليقدا دفن ائديله جکدي.
آنا، باليقچيني دفن ائدندن سونرا ال-اوزونو دوزلو دنيز سويو ايله يويوب يئنه يولونا روان اولدو. ايندي او ايري کورکلي آواري دا چيينينه آتميشدي.
يول اوزانير، اوزانيردي.
***
اولجه، موخته ليف جيناح و ايستيقامتلردن آلديغي غفيل ضربه لردن چاشيب قالان دنيز جاناواري، تدريجن اؤزونو اله آليب، يئني دؤيوشه آتيلماق نيیتينه دوشموشدو. دئيه سن، وحشيني ان چوخ هيددتلنديرن بو قدر گوجون آز زامان ايچريسينده بير يئره جم اولوب اونو ازمک، لاپ ائله محو ائتمک آرزوسونا دوشمه سي ايدي. او بير قدر گئري چکيليب سويون آلتيندا گوج توپلاياندان سونرا قطعي قرارا گلميشدي: دنيزه ياد اولان دوشمن قوووه ني دارماداغين ائتمک!
توقاي قارماقاريشيق دوشونجه لرين منگنه سينده چيرپينا-چيرپينا قالميشدي.
ايندي قورو ايله سويون باريشماز تمثيلچيلري گؤز-گؤزه دايانميشديلار. بلکه ده ائله بو دونيادا باش وئرن بوتون فلاکتلرين کؤکونده قورو ايله سو آراسيندا گئدن ابدي موحاريبه لر دايانير؟ آخي دئييلنلره گؤره، نه زامانسا بوتون دونيا يالنيز سودان عيبارت ايميش. اولسون کي، او زامانلار اينسانلارلا باليقلار عئيني يئرده- عئيني سولاردا بيرگه ياشاييرميشلار. سونرالار قورو سودان اوز دؤندريب، اوندان آرالانيب. بونون سببي اينسانلارا، او جومله دن توقايا دا، معلوم دئييلدي. بلکه بو "آيريلما"نين نه ايله باغلي اولدوغونو آکولا بيليردي؟ بلکه اينسانلار بير واخت باليقلارا خيانت ائديبلر؟ بلکه باليق ائله بو سببدن اينسانلا حاق-حساب چوروتمک ايسته يير؟
دنيز وحشيسي آچيق-آشکار اؤز گوجونو گؤسترمک ايسته ييردي. بو، تصادوفي تهلوکه دن داها چوخ، مقصدلي قيصاصچيليغا بنزه ييردي...
آکولا اوچون بوراداکي - اونون بورنونون اوجونداکي، بو قورخولو قيصاصچيلارين هاميسي گلمه و ياد ايدي. حتّی اؤز چئويک و عيشوه لي حرکتلري ايله اونون ديققتيني اساس هدفدن يايينديريب چاش-باش سالان، هردن هاوايا توللانيب ايتي قانادلاري ايله اونون باشينا ضربه لر ائنديرن او اوزونسوو، شففاف-گوموشو باليغين بئله، بو سولارا قطعييين دخلي يوخدو! آخي او، دونيايا بو دنيزده گؤز آچميشدي و اطرافينداکي سو حئيوانلاري نين هاميسينا ياخشي بلد ايدي. آکولا، بو سولاردا ايلک دفعه ايدي کي، بو جور عجایيب باليق گؤروردو. او آرادا گيره وه يه ساليب بو اؤزوندن موشتبئه آخماقلا آيريجا حاق-حئساب چکمک ايسته ييردي. آما هله ليک بئله بير الوئريشلي فورصتي قازانا بيلميردي کي، بيلميردي؛ چونکي او ياراماز-حيله گر باليق، آکولانين نيیتيني دويان کيمي هاوايا توللانيردي. باليغين آرخاسينجا هاوايا آتيلان وحشي نين تپه سيني ائله همين آنداجا اونون باشي نين اوستونده دؤوره ووران قارتال ديمديکله ييردي. دؤيوشچو دوستلاري گليب چيخاندان سونرا دنيز جاناواري نين اساس رقيبي نين - قاييقداکي آدامين ايشي خئيلي آسانلاشميشدي؛ ايندي همين رقيب، الينده کي آواري تئز-تئز ايره لي اوزاداراق سانکي اونو عصبيلشديريب اؤزوندن چيخارماق ايسته ييردي؛ غضبله نيب هوجوما آتيلماق ايسته ين آکولا، بئله آنلاردا باشقا جيناحدان ضربه آليردي؛ توکلو هئيوره- قايوت، الوستو اولاييب ايره لي شيغيييردي. حتّی دنيز جاناواري ايله آلاباش بير نئچه دفعه اوز-اوزه، کلله-کلله يه گلميشدي. چوخ غريبه ايدي: اونلارين هر ايکيسي نين- آکولا و ايتين اوزونسوو، زهملي صيفتلري، ايتي گؤزلري بير-بيرينه چوخ بنزه ييردي. سادجه اولاراق ، قايوتون بوتون بدني، ائلجه ده باشي، توکون ايچينده ايتميشدي؛ دنيز جاناواري ايسه باشدان-آياغا توکسوز و سابون کيمي سوروشکن ايدي.
آکولا ايندييه جن هئچ بير دؤيوشده مغلوب اولماميشدي. او هميشه اؤز رقيبيني پارچالاييب محو ائله ميشدي. دوشمنله سوناجان ووروشماق ايستگي اونون قانينا، جانينا هوپموشدو.
نؤوبتي حمله زاماني آکولانين تپه سيندن ائنديريلن گوجلو ضربه نتيجه سيز اؤتوشمه دي: بو دفعه قارتالين ايتي ديمديگي، اونون وحشي مئشه آغاجلاري نين قابيغي کيمي تاريم-برک، قابا دريسي نين آلتينا ايشله ميشدي. آز سونرا سولارين اوستونده توتقون قان لکلري گؤروندو. هانسيسا دنيز جانليسي نين بو قدر قاني اولدوغونا توقاي اينانماق ايستميردي. آما نه ائده سن کي، هر شئي گؤز قاباغيندا ايدي: دالغالارين اوستونده اويناشان قان ايزلري گئت-گئده چوخالماقدا ايدي.
دنيز وحشي نين باشينا هرلندي؛ اوستونه قيپقيرميزي آغير، قورخونج دالغالار يئريدي. سو جاناواري غضبله فينخيريب قارتالا ساري توللانسا دا هئچ بير شئي حاصيل اولمادي؛ چونکي آيقوتون قاناد چالديغي يوکسکليک سادجه اولاراق فتح ائديلمز ايدي. باخ اوندا آکولا قاناد آچيب اوچا بيلمه ديگي اوچون بلکه ده عؤمرونده ايلک و سون دفعه پئشمانچيليق دويدو. آما اؤزونه تسکينليک وئردي: عيبي يوخدور، قارتال اوزاغا چکيلسه ده، اونون توکلو دوستو لاپ ياخينليقدادير! دنيز جاناواري کلبتين ديشلريني شاققيلداديب ايتين اوستونه آتيلدي. اونون نؤوبتي هوجومو ايله عيني واختا دوشن حمله دن - قارني نين آلتيندان وورولان و باشينا ائنديريلن ضربه لردن، وحشي نين گؤزلري قارالدي؛ قاييقداکي آداملا سويون آلتينداکي باليغين-ياقوتون قوشا ضربه سي اونو گئري تپدي. آما مسئله بونونلا باشا چاتمادي؛ باشيني تزه دن سويون اوستونه چيخاريب اؤزونه يئني هوجوم مؤوقعيي سئچمک ايسته ين دنيز جاناواري کورگينده دهشتلي آغري دويدو؛ بو دفعه وحشيني ظاهيرن اونون اؤزونه بنزه ين توکلو رقيبي قاپميشدي.
دنيزين سولاري اوزرينده کي قان لکلري گئت-گئده آرتماقدا ايدي...
اطرافدا باش وئرنلر توقايا هله ده عجایيب بير يوخو و يا مؤعجيزه کيمي گؤرونوردو؛ "دوستلار"ينين غفيلدن دنيزده پئيدا اولماسي- اونلارين بير آنداجا آکولانين باشي نين اوستونو قارا بولود کيمي آليب " مودافيعه سددي " قورماسي، ظاهيرن ائله ده آغلاباتان مسئله دئييلدي. آما کور-کور، گؤر-گؤر: هامي نين ديلسيز-آغيزسيز، عاقيلسيز-کامالسيز حئساب ائتديگي باليق، قارتال و آلاباش دنيزين قوينونا سانکي توقايين يوخولاريندان قاچيب گلميشديلر و ايندي بو باش وئرن ايشلر ده ائله او قورخولو يوخولارين داوامي ايدي. دي گل کي، بوتون بونلار هئج ده يوخودا يوخ، حياتدا، اؤزو ده قانلي سولارين قوينوندا باش وئريردي. بعضاً اينسان اؤز يوخولاريندا بئله، گؤره بيلمه ديگي دهشت و فلاکتلري حياتدا ياشامالي اولور.
آرتيق توقايين خيلاص اولاجاغينا اولان اينامي خئيلي آرتميشدي. وفالي " دوستلار" - باليق، قارتال و آلاباش اونون احاطه سينده ايديلر. اونلار ديشلريني غضبله شاققيلدادان جاناوارا سويون آلتيندان، ائلجه ده اؤندن، آرخادان و هاوادان آغير ضربه لر ئنديريرديلر.
ايندي وحشي ايله دؤيوشمک، اونون آرامسيز و آمانسيز هوجوملاريني دف ائتمک توقايين اؤزو اوچون ده خئيلي آسانلاشميشدي. باشي قاييقداکي آدامين "دوستلاري" ايله ووروشماغا قاريشان آکولانين ايري کلله سينه ائنديريلن آوار ضربه لري نين سايي و سامبالي دا آرتميشدي. دنيز جاناواري کورطبيعي شکيلده حيسس ائديردي کي، اونون اساس دوشمني قاييقداکي آدامدير؛ بونا گؤره ده او، هر وجهله بو ديريباش، جلد، غضبلنميش آدامي ووروب قاييقدان سويا سالماق، ديديب-پارچالاماق ايسته ييردي. آما نه قويروغو ايله قاييغا ووردوغو ضربه لرين بير نتيجه سي حاصيل اولوردو، نه ده اونو- ايکي آياقلي دوشمني شيل-کوت ائتمک ايستگي نين.
بو قانلي دؤيوشده طرفلردن هئچ بيري ديگرينه ذره قدر ده گوذشته گئتمک، گئري چکيلمک ايستميردي. دنيز وحشيسي نين قارشيسيندا اَييلمک، اونا تسليم اولماق توقاي اوچون اؤلومدن داها بئتر ايدي؛ نه قدر غريبه ده اولسا اونون اؤز عاقلينا و گوجونه اولان اينامي گئت-گئده داها دا آرتماقدا ايدي؛ او امين ايدي کي، بو آغير سيناقدان يالنيز سويوق عاقيللا چيخا بيلر. توقاي طبيعتن دينج، حليم بير آدام اولسا دا، ايندي ايچيندن بير هيددت، کين آلوولو وولکان کيمي پوسکوروب چيخماقدايدي. هر نئجه اولسا دا او الي-آياغي، عاقلي-کامالي يئرينده اولان بير اينسان ايدي و اونون ياخاسيندان ال چکمک ايستمه يه ن بو وحشي نين درسيني عمللي-باشلي وئرمه لي ايدي.
توقاي اولجه اورگينده، سونرا ايسه اوجادان اؤز دوشمنيني سؤيمه يه باشلادي:
- باليق ليباسي گئيميش شئيطان! سن مني پارچالايا بيلميه جکسن! لعنته گله سن سني... شئيطان! ايبليس! شئيطان!..
توقاي شئيطانين اؤزونو حياتدا گؤرمه سه ده، آناسي نين ناغيللاريندان اونون باره سينده چوخ ائشيتميشدي. ايندي او، همين قورخولو، مکرلي، ييرتيجي شئيطانلا تهلوکه لي بير يئرده - آچيق دنيزين قوينوندا، اوز-اوزه گلميشدي. سانکي ائله ناغيللاردان گلميش بو باليق صيفتلي آمانسيز شئيطان اونو محو ئتمک ايسته ييردي. آما او، محو اولماياجاقدي...
" مني اؤلدوره بيلميه جکسن! من سندن گوجلويم! " يوخ... بو جور اؤزونه آرخايينليق اونون حياتيني گودازا وئره بيلردي... او، هله دؤيوشمه لي ايدي... قارشيدا اونو آغير سيناق گؤزله ييردي...
آکولا آرابير گئري چکيليب، قورغوشون کيمي آغير سولارين گيردابيندا گؤرونمز اولسا دا، توقاي اؤزونون ساييقليغيني بير آن دا اولسون ايتيره بيلمزدي. اوغلان، حتّی دينجيني آزاجيق آلماق ايسته ينده بئله، آواري ديزي نين اوستونه قويوب اونون دستگيندن برک-برک ياپيشيردي.
توقاي حيسس ائديردي کي، يوخوسوزلوق و يورغونلوق اونو اوزوب الدن سالماقدادير. او، دينجلمک ايسته يير، آما بونون نئجه تهلوکه لي اولدوغونو دوشوننده سکسکه يه دوشوب ديکسينير، قاييغين دؤشمه سينده گؤللنن شور سودان اوز-گؤزونه ووراراق يوخوسونو قووماق ايسته ييردي.
توقاي باشيني قالديريب بوزاران اوفوقلره باخدي. سونرا اطرافينا نظر سالدي. غريبه ايدي: آکولا گؤزه ديميردي؛اوغفيلدن يوخا جيخميشدي. بلکه دنيز جاناواري دؤيوشدن بئزه رک گئري چکيلميشدي؟ "دوستلار"سا ياخينليقدا ايدي. دئيه سن، اونلار آچيق دنيزده قاناد چالماقدان اوسانميش، وحشي ايله دؤيوشدن يورولموشدولار؛ يقين کي، دينجلمک ايسته ييرديلر. "دوستلار" ين نيیتيني حيسس ائدن توقاي اونلاري هارايلاييب يانينا چاغيرماغا باشلادي:
- ائهئي! ياقوت! قايوت! آيقوت!.. قاييغا دولوشون! گلين بير آز دينجه لين! ائهئي-ي-ي...
"دوستلار" اؤزلريني توقايا چاتديرديلار. آز سونرا اونلار قاييقدا - توقايين يانيندا ايديلر. هاميسي نين اوز-گؤزو، بدني سويا و قانا بله نميشدي. توقاي کؤورلدي. اونو قه هر بوغدو. "دوستلار" آغير دنيز دؤيوشلرينده، ايلک دفعه ايدي کي، قيسا فاصيله الده ئديب بير يئره توپلاشا بيلميشديلر. اوغلان الي ايله ياقوتون، قايوتون و آيقوتون باشينا سيغال چکدي، اوخشادي؛ آستا، حزين سسله دانيشماغا باشلادي:
- هئچ گؤزلريمه اينانماغيم گلمير. دوغرودانمي بو سيزسينيز، منيم وفالي دوستلاريم؟ مني نئجه آختاريب تاپميسيز؟.. ياقوت... قايوت... آيقوت... عزيزلريم. بس آنامين خبري اولدومو سيزين گليشينيزدن؟.. بس شهلا نئجه، او دا آگاه اولدومو سيزين بو عفيل سفرينيزدن؟.. هه؟.. نييه سوسورسونوز؟ ائشيديرسينيز مني؟.. البتته، ائشيديرسينيز! من سيزينله عؤمرومون سونوناجان دوست اولاجام! بيز بوندان سونرا دا هميشه بير يئرده اولاجاغيق... ائله دئييلمي؟ هه؟.. آنلاييرسينيزمي مني؟ البتته، آنلاييرسينيز! منيم عزيز دوستلاريم... کؤنول سيرداشلاريم...
توقاي ئله صؤحبت ئده-ئده مورگوله مه يه باشلادي. اؤتري چيمير زاماني اونون گؤزلري نين اؤنوندن آنانين و شهلانين سيلوئتلري اؤتوب کئچدي. او اؤز ائولريني، حوووضو گؤردو بو اؤتري يوخودا. سونرا گؤردو کي، دوستلاري - آلاباش، قارتال و باليق ائودن چيخيب دنيزه ساري اوز توتوبلار. توقاي دوستلاريني سسله مه يه باشلادي: «ائهئي! ياقوت... قايوت... آيقوت »...
بو اثنادا زلزله قوپدو. توقايين آياغي نين آلتيندان يئر قاچدي.
توقاي گؤزلريني آچيب يئريندن ديک آتيلدي: سن دئمه، اونون آياغي نين آلتيندا يئر يوخ، دنيز ييرغالانيرميش.
قاييق لنگر ووروب تيتره دي. آکولا تزه دن هوجوما کئچميشدي. توقايين دوستلاري يئني دؤيوشه آتيلميشديلار. قانلي-کؤپوکلو دالغالار قاييغين يانلارينا چيرپيليردي.
توقاي سينه سينه سيخديغي آواري يوخاري قالديريب بوينونو قاييغين ايچينه دوغرو اوزادان وحشي نين سوروشکن کورگينه ائنديردي. آکولا فيسيلداييب گئري چکيلدي. آلاباش ايتي ديشلريني باياق توقايين ضربه ائنديرديگي يئره- دنيز جاناواري نين کورگينه سانجدي. آکولانين بئليندن فيشقيران قان اطرافا - دنيزه، قاييغا و آلاباشين اوزونه سپه لندي. وحشي آغري نين شيددتيندن اؤزونو ايتيرسه ده مؤوقعييني الدن وئرمک ايستميردي: او، قويروغو ايله قايوتون باشينا ضربله ووروب تزه دن قاييغا ساري توللاندي. قاييق فيرلانيب يئرينده قؤوس جيزدي.
***
شهلا، قاديني ائودن تک-تنها يولا سالديغينا گؤره اؤزونو هئچ جور باغيشلايا بيلميردي. گرک او دا درد يوکونو اؤزويله گؤتوروب نامعلوم عنوانا اوز توتان آنايا قوشولوب گئديدي. دوزدور، قادين ائو-ائشيگي اونون اوميدينه قويوب گئتميشدي و گئدنده ده برک-برک تاپشيرميشدي کي، هئچ يانا ترپنمه سين. آما ايندي کيمسه سيز حَيَط-باجادا قالماغين بير معناسي وارديمي؟
شهلا بير خئيلي گؤتور-قويدان سونرا يولا چيخماغي قرارا آلدي. گئتمزدن اول اؤز آناسينا باش چکدي، حَيَط-باجاني سوپوردو، ائو-ائشيگي سليقه يه سالدي، يويولموش پال-پالتارلاري اوتوله دي...
هه، ايندي گئتمک اولاردي.
باشينا اؤرتدويو قالين، قارا شال اونو جاوان قيزدان داها چوخ، ياشلي قادينا بنزه ديردي. الينه آلديغي قابيغي سويولموش، سليقه لي آغاج پارچاسي ايسه "قاري"نين ازلکي ناتامام علامتلرينه ايندي نسه بير تامليق، بيتکينليک وئريردي.
شهلا حَيَط-باجايا بير ده گؤز گزديريب قاپيني باغلادي، خئيلي گؤتور-قوي ائتدي. او، دنيزه ساري گئتمگي قرارا آلدي. آما دنيز ائله ده ياخين دئييلدي. قيز ايسه اؤز ايستگينده قطعي ايدي؛ اونا گؤره ده ايناملي آدديملارلا يولا چيخدي.
شهلا توقايلا قونشو حَيَطده بؤيوموشدو. اوشاق واختلاريندا تئز-تئز ساواشان، موباحيثه ائدن اوغلانلا قيز، زامان کئچديکجه ندنسه بير-بيرلري ايله ائحتيياطلا، چکينه-چکينه داورانماغا باشلاميشديلار. اونلاردان هئچ بيري بو اوتانجاقليغين سببيني هئچ جور آيدينلاشديرا بيلميردي. راستلاشاندا هر ايکيسي پؤرتوب قيزارير، باشلاري ايله سالاملاشيب تئزجه آرادان چيخماغا تله سيرديلر. سانکي بئله آنلاردا لال اولوردولار. اصلينده ايسه اوغلانلا قيز داخيلن دايم بير-بيريني گؤرمک آرزوسو ايله آليشيب-يانيرديلار. توقاي آرابير ائولري نين دامينا چيخيب اورادان قونشو ائوين حَيَطينه باخاردي. آخي، شهلا اورادا-حَيَطده اولا بيلردي. قيزي هر گؤرنده اونون ايچيندن غريبه ، ايضاحي چتين اولان خوش بير گيزيلتي کئچيردي.
ائله شهلا دا قونشو اوغلاني گؤرمه يه نده داريخاردي. او، بعضاً اؤز ائولري نين ائيوانيندا دايانيب گيزليجه قونشو حَيَطه تاماشا ائدردي؛ حَيَطده اؤز "دوستلار"ي ايله اوينايان توقايين حرکتلريني ايزله مک قيز اوچون چوخ ماراقلي ايدي. حتّی توقاي ائوده اولماياندا قيز اونلارا گئديب قادينلا گؤروشر، سونرا "دوستلار"لا اويناماغا باشلاياردي. او دا آنا کيمي توقايين عطريني-قوخوسونو اونون "دوستلار"يندان آلاردي. ائله "دوستلار" دا، يني قارتال، آلاباش و باليق دا اؤز مئهريني قيزا سالميشدي.
بو بالاجا اوبادا ائله بير ياخين قوهومو و رفيقه سي اولمايان شهلا، توقايين "دوستلار"يني گؤرمه يه نده داريخيردي. قيزي بيرجه گون گؤرمه يه ن آنا دا ائله "دوستلار" کيمي اونون خيففتيني چکردي. آرابير شهلايا آلتدان-آلتدان ديققتله گؤز قويان قادي نين اورگيندن نه لر کئچديگيني آنلاماق چتين اولسا دا، قيز سؤوق-طبيعي حيسس ائديردي کي، توقايين آناسي اونو هر گون گؤرمک، اونون سسيني-گولوشونو هر گون ائشيتمک ايسته يير.
ايندي يولو الينه آليب اؤز قونشولاري نين آرخاسينجا يولا دوشن قيزي ندنسه بيردن-بيره آغلاماق توتدو. گؤره سن، بو قورخولو سفرده اونو نه گؤزله يير؟ گؤره سن، او، توقايي، اونون آناسيني، "دوستلار"يني بير داها گؤره بيله جکديمي؟
قيز اللريني ائيضن آنا کيمي بولودلو-توتقون گؤيه آچيب پيچيلتي ايله دوعا ئتمه يه باشلادي: " تانريم، منه يار اول... "
سانکي تانري اونون سسيني ائشيتدي. شهلا اؤز دوعاسيني دئييب باشا چاتديراناجان گؤيون اوزونده کي قارا-بوز بولودلار دوه کارواني کيمي چکيليب سونسوزلوقدا گؤزدن ايتديلر. و بو آنلاردا گؤيون اوزو بيردن-بيره آچيلدي، ايشيقا غرق اولدو. بو گور ايشيق سئلي، يئري ده نورا بويادي. قيزا ائله گلدي کي، گؤيون اوزوندن يئره سوزولن او ايشيقدان اونون اورگينه ده شففاف ذره لر آخماغا باشلايير.
شهلا آدديملاري نين سورعتيني آرتيريب هنيري اوزاقدان دويولان، خيشيلتيسي اوزاقدان ائشيديلن دنيزه ساري اوز توتدو. بو آنلاردا قيز، يئنه ده توقايين آناسي کيمي جاني-ديلدن دنيزه دوعالارائتمه يه باشلادي: " آي آنام دنيز، قلبيم دنيز، روحوم دنيز. دالغالارينا ده کي، غضبلنمه سينلر. وحشي باليقلارينا ده کي، توقايا توخونماسينلار. گميلرينه ده کي، توقايي خيلاص ائتسينلر. رحميني بيزدن اسيرگمه، آنام دنيز... آمان دنيز. مني ائشيديرسنمي، دنيز؟ "
گؤره سن، دنيز قيزين دوعاسيني ائشيديرديمي؟
***
توقاي شيليملنميش کؤينگيني اَينيندن چيخاريب قاييغين بير کونجونه آتدي. اوغلانين سولغون گونش شوعالاري آلتيندا ميس کيمي پارليدايان بدنيندن آخان تر دامجيلاري قيپقيرميزي قانا قاريشميشدي؛ بو، يقين کي، آکولانين قاني ايدي.
توقاي سؤوق-طبيعي حيسس ائديردي کي، آلديغي يارالاردان داها دا غضبلنميش دنيز ييرتيجيسي يئنه هوجوما حاضيرلاشير. دوزدور، هله آکولانين اؤزو گؤرونموردو؛ او آلديغي نؤوبتي ضربه دن سونرا دنيزين درينليگينه چکيلميشدي. آما چوخ گومان کي، بو مووققتي حال ايدي. يقين کي، بير آزدان هر شئي- قانلي ساواش، اؤلوم-ديريم موباريزه سي يئنه تکرار اولوناجاقدي.
توقاي تک آواري نه قدر فيرلاتسا دا بير نتيجه حاصيل اولموردو: قاييق سانکي قيرا-ساققيزا ياپيشميشدي، اونو يئريندن ترپتمک گئت-گئده داها دا چتينلشيردي. "دوستلار" يورولوب قاييغين ايچينه ييغيشميشديلار. اونلار ملول-ملول توقايا باخير، سانکي اوندان نسه يئني بير مصلحت اوموردولار. اوغلان قرار وئرمکده چتينليک چکيردي. آخي او نئيله يه بيلردي؟ بورادان ساحيل گؤرونسه ده، اونون اوزوب گئتمه سي مومکونسوزدو. يوخ، مسئله تکجه بئله اوزون مسافه ني قطع ائتمکده دئييلدي؛ اساس مسئله ييرتيجي نين هر آن گؤزله نيلن غفيل هوجومو ايله باغلي ايدي. آکولانين "دوستلوغو"نا اعتيبار ائتمک اولمازدي!
دوزدور، "دوستلار" قاييقدان ائنيب لاپ ائله بو آن راحاتجا ساحيله دوغرو گئده بيلرديلر. آما قيريملاريندان حيسس اولونوردو کي، اونلاردان هئچ بيري توقايي تک قويوب قاييغي ترک ائتمک ايستمير.
بو لعنته گلميش قاييغي ايسه يئريندن ترپتمک اولموردو!
بير ياندان دا سوسوزلوق... توقايين اؤزو ايله گؤتوردويو ائحتيياط سو آرتيق توکنميشدي. او سون قطره لريني باشينا چکديگي دمير قابي قاييغين کونجونه آتميشدي. بو قدر سويون احاطه سينده بير ايچيم سويا حسرت قالماق هم آغلامالي، هم ده گولمه لي ايدي.
او آرابير چاتلاميش ديل-دوداغيني قاييغين ايچينه دولموش دوزلو-شور سو ايله ايسلادير، دي گل کي، بونون هئج بير خئيري اولمور، جيگري سوسوزلوقدان اود توتوب يانيردي.
توقايين گؤزو دوستلاري نين اوزونده اولسا دا، خيالي تئز-تئز قاناد آچيب اوزاقلارا اوچوردو. آنا ايله شهلا اونون ياديندان بير آن دا چيخميردي. او اؤز دوغمالارينين ايندي نئجه بؤيوک آغري و کدر ايچينده وورنوخدوقلاريني بوتون آيدينليغي ايله تصوور ائديردي. او تئزليکله ائوه دؤنمک - گؤزو يوللاردا قالان آنا و شهلاني سئوينديرمک ايسته ييردي! او، ائوه دؤندوکدن سونرا ايندي قاييقدا جمعلشميش دوستلاري نين هر بيريني اؤز "وطنينه " يولا سالماق ايسته ييردي. قوي باليق دنيزه، قارتال سمايا، آلاباش ايسه مئشه يه اوز توتسون! آخي هر کسه اؤز وطني عزيزدير! هر کس اؤزونه دوغما اولان يئرده ياشاماليدير. بس گؤره سن "دوستلار"ي اونو ترک ائتمه يه، اوندان آيريلماغا راضي اولاجاقديلارمي؟ چتين... ائه، بير ده کي، هله اونون اؤزو - توقاي، دوغما اوجاغا ساغ-سالامات قاييدا بيله جکديمي؟ بير آللاه بيليردي کي، اونو و اونون دوستلاريني قارشيدا هانسي سيناقلار گؤزله يير.
غضبلي ايلان فيشيلتيسينا بنزه ين سس اونو خياللاردان آييردي. ييرتيجي نين پارچالانميش کلله سي تزه دن سويون اوستونده ظوهورائدنده، قاييقداکيلارين هاميسي بير آندا حرکته گلدي: قارتال قيي ووروب هاوايا قالخدي، آلاباشلا باليق ايسه سويا آتيلدي. دنيز وحشيسي قوش کيمي يوخاري آتلانيب قاييغين ايچينه دوغرو ايستيقامت گؤتوردو. توقاي دوشمني ايلک دفعه ايدي کي، بئله ياخين مسافه دن گؤروردو؛ اونلار آز قالا بورون-بورونا، کلله-کلله يه گلديلر. اوغلان جلد گئري چکيليب الينده کي آواري هاوادا فيرلاداراق وحشي نين باشينا ائنديرمک ايسته دي. دنيز جاناواري بير گؤز قيرپيميندا آوارين ائنلي کورگيني ديشلري آراسينا آليب گئري سيچرادي.
توقاي اونون آغ، ايري، ايتي ديشلريني گؤروب غئيري-ايختيياري قيشقيردي:
- ياقوت! قايوت! آيقوت!...
دنيز جاناواري آواري قاپيب تزه دن دنيزه باش ووردو: ائله بيل کي، آواري - بو قورخولو سيلاحي، دنيزده - دالغالارين آلتيندا گيزلتمک ايسته ييردي. حقيقتن، "قورخولو سيلاحي" - آواري سودا "باسديريب گيزله دندن" آز سونرا آکولا يئنيدن اوزه چيخيب هاوايا توللاندي؛ دئيه سن، سيلاحسيز دوشمنله دؤيوشمگين داها آسان اولدوغونو دنيز ييرتيجيسي ياخشي آنلاييردي. آما آکولا سويون اوستونده گؤرونن کيمي، قارتالين ايتي ديمديگي تزه دن اونون تپه سينه سانجيلدي. ائله بو واخت دالغالارين آلتيندا - دنيزين ديبينده " گيزله ديلميش" آوار سويون اوستونه چيخدي. آلاباش ايره لي شيغيييب آواري قاپدي و قاييغا دوغرو اوزمه يه باشلادي.
باليق جلد سويون آلتينا باش ووروب ايتي قانادلاري ايله ييرتيجي نين کؤروک کيمي ائنيب-قالخان سينه سينه چپه کي ضربه ووردو.
آلاباش باشيني بير نئچه دفعه هرله ييب ديشلري ايله سيخديغي آواري قاييغا ساري آتدي. توقاي "سيلاحي" گؤيده قاپدي.
آکولا اؤزونو ايتيرميشدي. لاکين اونون ايراده سيني بئله تئزليکله سينديرماق اولمازدي: او، يئنه ووروشاجاق، اؤز دوشمنلريندن قيصاص آلاجاق، اونلاري ايتي ديشلري ايله پارچالاييب تيکه-تيکه ائده جکدي. بو بؤيوک سويون بؤيوک صاحیبيني مغلوب ائتمک، ازمک، اؤلدورمک مگر بئله آسان ايشدير؟.. يوخ، او، اؤز مغلوبيتي ايله بئله آسانليقلا باريشا بيلمزدي!
آکولا وار گوجونو توپلاييب يئنه قاييغا ساري آتيلدي. او آرتيق اؤز اساس دوشمني نين محض قاييقداکي الي آوارلي نين اولدوغونو دقيقلشديرميشدي! دنيز جاناواري اؤزلوگونده امين ايدي کي، او "سيلاحلي" آدامين ايشيني بيتيرسه، يئرده قالانلار- اونون "دوستلاري" آسانليقلا تسليم اولاجاقلار. قارتال قانادلاريني آچيب تزه دن ايره لي شيغيدي، ديمديگيني وحشي دنيز حئيواني نين کورگينه سانجدي. آلاباشين ايتي ديشلري آکولانين قويروغونو سيييردي. باليق يوخاري آتيليب باشي ايله ييرتيجي نين سينه سينه ايتي، آغير ضربه لر ووردو. توقاي گئري چکيله رک الينده کي آواري هاوادا فيرلاييب آمانسيز دوشمنين باشينا ائنديردي. آما... آما گئج ايدي. ييرتيجي آرتيق قاييغين ايچينه دوشموشدو؛ او، ايتي ديشلريني شاققيلداديب هيددتله ايره لي سوخولدو. توقاي غئيري-ايختيياري گئري سيچرادي، کلله ماياللاق آشيب دنيزه - سويوق، آغير، دوزلو دالغالارين قوينونا دوشدو؛ آخي، غضبلنميش وحشي سو حئيواني ايله البه ياخا ووروشماغين معناسي يوخ ايدي. بو جور دؤيوش، حياتيني ريسکه آتماق دئمک ايدي.
آکولا "زيرئهلي" قانادلاريني قاييغين تاختا دؤشمه سينه سؤيکيه رک سويون ايچينده چابالايان دوشمنلرينه باخيردي. سانکي او، داخيلن گولوب اونلارا ريشخند ائدير، آرتيق هر شئيين سونا چاتديغيني بيلديرمک ايسته ييردي. اونون ديشلري نين شاققيلتيسي دا آيدينجا ئشيديليردي. دئيه سن، ييرتيجي قطع ائتميشدي کي، اونون اساس دوشمني - قاييقداکي الي آوارلي کس، بو سويوق سولارين قوينوندا اوزون موددت قالا بيلميه جک، بير آز چابالاياندان سونرا دنيزين ديبينه غرق اولوب بوغولاجاق، نهايت، اونون اوچون لذتلي يئمه چئوريله جکدي! اساس دوشمن اؤلندن سونرا يئرده قالانلارلا حاق-حئسابي اوزمک آساندير!
توقاي دالغالارين قوينوندا چابالاييردي. بو آنلاردا قاييغا ال اوزاتماق، اونون هانسيسا بير حيصه سيندن ياپيشماق دا قورخولو ايدي: آکولا ايتي ديشلريني اونون بدنينه باتيرماغا فورصت گزيردي.
ايندي دوستلارين هاميسي دنيزده ايدي. سويوق دالغالار اونلاري يارپاق کيمي آتيب-توتوردو.
دنيز جاناواري، دئيه سن، قازانديغي غلبه نين لذتيني ياشاييردي: او، قويروغو اوسته قالخيب غضب دولو گيزلي بير ممنونلوقلا اؤز دوشمنلريني سوزمه يه باشلادي؛ اونون قاپقارا، غضبلي گؤزه لرينه سانکي سونسوز بير ظولمت چؤکموشدو. توقايا ائله گلدي کي، آکولانين گؤزلريندن پوسکورن ظولمت وحشي نين داخيليندن - ايچي نين درينليگيندن آخيب گلير. دئيه سن، باليقلارلا آداملار آراسيندا دوشمنچيليکدن ساوايي، غريبه بير اوخشارليق دا واردي: اونلارين بعضيلري نين ايچي ظولمتله، بعضيلرينينکي ايسه ايشيقلا دولو اولورموش. و چوخ گومان کي، باليقلار و آداملار دئييل، لاپ ائله بو دونيانين اؤزو ده ظولمت و ايشيقدان يوغرولموشدو. چونکي دونيانين دا بير طرفينده ظولمت، ديگر طرفينده ايسه ايشيق حاکيم ايدي. ايشيقلا ظولمت هئچ واخت بير يئرده اولا بيلميردي و يقين کي، هئچ بير زامان اولا بيلميه جکدي ده.
ايندي ظولمتله ايشيق اوز-اوزه گلميشدي.
دئيه سن، دنيزده ال-قول آتيب چابالايان، اوزلشديکلري غفيل تهلوکه دن چاشيب قالان "دوستلار"دان فرقلي اولاراق، قارتال ايلک قطعي قراري قبول ائتدي. گؤزلريندن غضب و هيددت ياغان سما پلنگي - آيقوت، قاناد چاليب بير قدر يوکسکلييه قالخاندان سونرا، سورعتله اوزواشاغي شيغيياراق قاييغا - دنيز جاناواري نين اوستونه هوجوم چکدي. سانکي دنيزده شيمشک چاخدي، ايلديريم شاققيلدادي. ***
ساحيل بويو اوزانان يول، قاديني سرت قاياليقلارين، تيکانلي کوللارين آراسيندان کئچيريب نارين قوم تپه جيکلري نين يان-يانا دوزولدويو بومبوز بير يئره چيخارتدي.
بو يئرلرده نه بير ايز واردي، نه ده بير لپير. آلاباشين آياق ايزلري ايسه آرتيق چوخدان گؤزه چارپميردي. آنا، آوارين کورگيني قوم تپجيکلرينه سؤيکه ييب اطرافا گؤز گزديريردي. هر طرف - دنيز ده، ساحيل ده، سما دا بومبوز ايدي.
ياخشي کي، اطرافا سوکوت چؤکموشدو. اگر کولک اسمه يه باشلاسايدي دنيز چالخالاناجاق، آغير دالغالار بير-بيري نين بئلينه قالخيب دونيايا مئيدان اوخوياجاقدي. آنا اوزونو دنيزله اوفوقون کسيشديگي سمته توتوب پيچيلتييلا کوله يه يالوارماغا باشلادي:
- آي کولک، قوربان اولوم من سنه،
هله بير دايان، اسمه.
قانادلاريني گرمه يه تلسمه...
آخي، منيم عزيز بالام
سنين غضبينه توش گله بيلر،
قاييغي دنيزده غرق اولا بيلر. .
او، دنيزه گئديب، ائوه دؤنمه ييب.
باخ، آنا اورگيم منه دئيير کي،
او، ماوي سولارين قوينوندادير،
اؤزو ده ساغ-سالاماتدير...
منيم توقاييم عذابلارا، آغريلارا
سينه گرن بير اؤولاددير.
اونون قوجا باليقچي يولداشي
توفانا- قاسيرغايا دوشوب هلاک اولوب.
منيم بالام دنيزده تنها قاليب.
منه، منيم توقاييما رحمين گلسين، کولک...
بوندان سونرا آنا عيني قايدا ايله اوزونو گونشه، دنيزه، گؤيه توتوب دوعا ائتمه يه باشلادي. آنا دنيزين قوينوندا هالاي ووران قاغاييلاري دا اونوتمادي: بو آزاد، خوشبخت سما قوشلاريندان ايلتيماس ائتدي کي، اگر خبردارديرلارسا، اونا يعني آنايا، اؤز اؤولادي نين يئريني بيلديرسينلر.
آنا اؤز دوعاسيني اوخويوب آواري چيينينه گؤتوردو. ائله بو دم سانکي کيمسه اونا، دؤنوب آرخايا باخماغي ايشاره ائتدي. و آنا سکسکه ايچينده قانريليب گئري باخدي. بير قارالتي اوزاقدان سورعتله اونا ساري گليردي. ائله بيل آنانين آياقلاري قومسالليغين درينليگينه ايشله دي. يئريندجه قورويوب قالدي. قارالتي دوز اونون اوستونه گليردي. آنا خوفلاندي. گؤره سن، بو، کيم اولا بيلردي؟ قارالتي اونا ال ائتدي. آنانين ديزلري اسمه يه باشلادي. اونو هيجان حيسسي ساردي. بلکه بو گلن آدام آنايا نسه مودهيش بير خبر گتيريردي؟
اوز-گؤزونو قارا شاللا برک-برک بوروموش قارالتي گليب يئتيشنده آنا اونو گؤزلريندن تانيدي: بو، شهلا ايدي!..
آنا غئيري-ايختيياري قيشقيردي:
- شهلا...
-آنا!..
قيز هميشه "خالا" دئيه، موراجيعت ائتديگي قاديني، ايلک دفعه ايدي کي، "آنا" دئيه چاغيريردي. اونلار بير-بيري نين اوستونه آتيليب قوجاقلاشديلار. سونرا هر ايکيسي ال-اله توتوب هؤنکوردو: سانکي قوشا سيمده حزين-کؤورک بير موسيقي سسله نيردي؛ بو، گؤزله نيلمز سئوينج و کدرين ياراتديغي سيرلي بير اووقات ايدي.
آنا قيزي چوخ دا سورغو-سوالا توتمادي. شهلانين اونون آرخاسينجا گلمه سينه بير ياندان عصبيلشسه ده، او بيري ياندان فرحلنميشدي. دئمه لي، قيز آناني سئويردي! دئمه لي، شهلا توقايين يولوندا هر بير چتينلييه سينه گرمه يه حاضير ايدي! دئمه لي، شهلا، آنايا و توقايا لاييق بير قيز ايدي...
اونلار ال-اله توتوب تزه دن يولا دوزلديلر...
اوزاقدا، اوفوقله سولارين بير-بيرينه قوووشدوغو يئرده قارالتيلار گؤروننده قيزلا آنا آياق ساخلاييب ماراقلا دنيزه تاماشا ائتمه يه باشلاديلار.
آنا هيجانلا ديللندي:
- قيزيم، دنيزين قوينونداکي او قارالتيلاري گؤرورسن؟...
- بلي، آنا...
- دئيه سن، اوراداکي قاييقدير، هه؟...
- بلي، ائلدير، آنا...
- بس او قاييق نييه سويون اورتاسيندا ساکيتجه دايانيب؟.. بلکه... بلکه منيم بالام...
آناني هيچقيريق بوغدو. شهلا باشيني آنانين کؤکسونه سيخدي. ايندي اونلارين هر ايکيسي نين اورگي تورا دوشموش باليق کيمي چيرپينيردي.
دنيزدن ساحيله دوغرو سرين مئه اسيردي.
***
قارتالين هوجوموندان سؤوق-طبيعي قورخويا دوشوب جاواب ضربه سي ائنديرمک ايسته ين غضبلي دنيز جاناواري قويروغونو قاييغين دؤشمه سينه سؤيکه ييب باشيني ايره ليیه دوغرو اَيدي؛ او اؤز ايتي ديشلريني رقيبي نين قانادينا سانجيب اونو آشاغي ائنديرمک، سونرا ايسه ديديب-پارچالاماق نيیتينده ايدي. قارتال دوشمنين مکرلي نيیتيني دويوبموش کيمي، هوجوم ايستيقامتيني بير آنداجا دييشدي؛ آيقوت بو دفعه ديمديگيني وحشي نين باشينا يوخ، گؤزلرينه، دوز ببگي نين ايچينه سانجدي. دنيز جاناواري سنتيرله ييب يانا اَييلدي. آما توقاي حيسس ائتدي کي، "دوستلار" عملياتي بونونلا باشا وورماق، بيتيرمک ايستميرلر. چونکي آکولا قاييغين يان طرفينه اَييلرکن، باياقدان هوجوم اوچون الوئريشلي فورصت آختاران ياقوت سويون ايچيندن يوخاري آتيليب وحشي نين او بيريسي گؤزونه قويروغو ايله چپه کي ضربه ووردو.
سانکي توقايين اؤزو کيمي ، "دوستلاري" دا بو دؤيوشون حلل ائديجي آني نين يئتيشديگيني حيسس ائتمکده ايديلر؛ ايندي حمله لرين سايي و کسه ري آرتميشدي.بلکه ده ضربه لر سنگيسيدي، هر شئي اونلارين ايستک و ايراده سي نين عکسينه نتيجلنه بيلردي. ائله بونا گؤره ده آمانسيز و گوجلو دوشمنه يئني مکرلي تدبيرلر تؤکمه يه ايمکان و واخت وئرمک اولمازدي؛ ائله بونا گؤره ده ضربه دالينجا يئني ضربه لر گليردي.
چوخ گومان کي، آرتيق گؤزلري هئچ بير شئي سئچمه يه ن ييرتيجي، هيددتله چيرپينيب سويا - اؤز اعتيبارلي "سنگرينه" آتيلماق ايسته ييردي. اونا بو ايشده توقاي اؤزو کؤمک ائتدي: اوغلان قاييغين يان تاختاسيندان ايکيللي ياپيشيب اونو اؤزونه ساري دارتدي. قاييق لنگرلنيب يانا اَييلدي. آکولا شاپپيلتي ايله سويا دوشوب چيرپينماغا باشلادي. او، هله ده تسليم اولماق نيیتينده دئييلدي.
آرتيق اؤزونو قاييغين ايچينده راحاتلاميش توقاي آواري قالديراراق، سون نفسينه جن ووروشماق نيیتيندن ال چکمه يه ن دنيز جاناواري نين ضعيفله مکده اولان بدنينه چيرپماغا باشلادي.
هر ايکي گؤزونو ايتيرميش وحشي سانکي داها دا قودوزلاشميشدي. ايندي بوتون دونيا اونا ظولمت کيمي گؤرونوردو. بو ظولمتين ايچينده، او، هله قيسمن ائشيتمکده اولدوغو - قولاغيندا عکس-صدا وئرن قاريشيق سسلره ساري حرکت ائدير، اؤزونون نؤوبتي هوجوم ايستيقامتيني دقيق موعينلشديرمه يه چاليشيردي.
دنيز جاناواري يئنه ده موباريزه آپارماق، ووروشماق نیيتينده ايدي. اونون خيصلتينده گئري چکيلمک، قيسمتينه چيخان اوودان ايمتيناع ائتمک دويغوسو يوخدو. او هميشه هوجومدا اولموشدو. او هميشه ديديب-پارچالاميشدي. عؤمرو بويو اؤزوندن ضعيفلرله دؤيوشمک، اونلاري محو ائتمک، اونو - دنيز جاناواريني لاپ بئزديرميشدي. او نه واختدان بري گوجلولرله اوز-اوزه گلمک، اونلارلا چارپيشماق ايسته ييردي. هه، باخ بو دا اونون هاچاندان آختارديغي گوجلو رقيب! اؤزو ده بوتؤو بير دسته ايله... آکولا بوتون گوجونو توپلاييب ايندي يالنيز قارالتيسيني زورلا سئجديگي قاييغا دوغرو شيغيدي؛ کلله سي ايله قاييغين يان ديوارلارينا گوجلو ضربه لر ائنديردي. اونون غفيل هوجومو عکس-هوجوملا قارشيلاندي: "دوستلار"ين ضربه سي دولو کيمي دنيز جاناوارينين باشينا ياغماغا باشلادي.
... ضربه لرين سايي و گوجو آرتديقجا دنيز جاناواري نين بدني کوتلشير، هئيي آزاليردي. گئت-گئده، ائله بيل کي، او، اؤز بدنيندن اوزاقلاشير، هاراياسا- ديبي گؤرونمه يهن قورخونج درينليکلره چکيليب گئديردي. ايندي اونون ييرتيب داغيتماق، ازيب پارچالاماق ائحتيراصي دا تدريجن اؤلزيیير، سولارا قاريشيب اريیيردي.
آخير کي، آلاباشين قطعي هوجومو هر شئيه سون قويدو. قايوت ايتي ديشلريني آکولانين بوغازينا سانجيب گئري دارتيندي. باياقدان هيددتي يئره-گؤيه سيغمايان، غضبله فينخيران دنيز جاناواري کسيک-کسيک خيريلداييب کورگي اوسته چئوريلدي. دالغالارين آتيب-توتدوغو وحشي نين باياقکي آشيب-داشان هيککه سيندن اثر-علامت قالماميشدي: او، سانکي درين يوخويا گئتميشدي. آرابير وحشي نين قويروغو تيتره ييردي.
بير قدر سونرا ايسه ييرتيجي تاماميله ساکيتلشدي. دالغالار وحشيني تزه دن آغزي اوسته چئويردي. قارتال قانادلاريني گريب دنيز جاناواري نين بئلي نين اورتاسينا - ايتي قيلينجي خاطيرلادان قانادين اوستونه قوندو. آما ايندي بو "قيلينج" کسه ردن دوشموشدو.
آلاباشلا باليق سئوينجدن آتيليب-دوشوردولر. آما بو سئوينجين عؤمرو چوخ چکمه دي. چونکي قاييق هله آچيق دنيزده ايدي و تک آوارلا اونو چکيب ساحيله آپارماق مومکون دئييلدي. اينديکي حالدا تک آوارلي قاييق تک قانادلي قوشا بنزييردي. تک قانادلا نه قدر اوجماق اولاردي؟
غفيلدن ئله بيل مؤعجيزه باش وئردي: قارتال قيي ووروب سمايا قالخدي. آلاباش اولاييب ساحيله دوغرو اوز قويدو. باليق دا سودا آتيلا-آتيلا جلد، آلاباشين آرخاسينجا اوزمه يه باشلادي.
توقايي تعججوب و هيجان حيسسي بورودو. او، قيشقيرماغا باشلادي:
- ائهئي! ياقوت! آيقوت! قايوت!.. دايانين، هارايا گئديرسينيز؟...
" دوستلار" اونو يا ائشيتمير، يا دا ائشيتمک ايستميرديلر. اوغلانين ديققتلي باخيشلاري اونلار گئدن سمته، اورادان دا ساحيله يؤنه لدي: ساحيلده بير جوت قارالتي واردي؛ گئييملريندن اونلارين هر ايکيسي نين قادين اولدوغو حيسس اولونوردو.
قادينلاردان بيري يايليق يئلله ديردي. او بيري قادي نين الينده نسه عجایيب بير آلت واردي، دئيه سن، بو، آوار ايدي - قاييق آواري.
توقايين اورگي هيجانلا وورماغا باشلادي.
دنيز جاناواري تيترک دالغالارين اوستونده اوزانيلي وضعيتده قالميشدي. دنيز اؤز وحشي بالاسيني آستاجا ييرغالايير، سانکي اؤز ديلينده اونا آغي دئييردي. بو آنلاردا توقايين ندنسه آکولايا يازيغي گلدي، اورگي آغريدي. حتّی کؤورلدي ده…
آللاه اؤزو شاهيددير کي، توقايين بو هيککه لي، غضبلي دنيز جنگاوري ايله هئچ بير عداوتي اولماميشدي. آکولا اونو و اونون کؤمگينه گلن دوستلاري پارچالاماق نيیتينه دوشموشدو. سولارين قوينوندا گئدن بو قانلي دؤيوشده طرفلردن بيري غاليب کيمي چيخميشدي.
دنيز جاناواري اؤز توکنمز هيککه سي نين قوربانينا چئوريلميشدي.
"اگر گوناهيم وارسا، باغيشلا مني، تانريم… " - دئيه، توقاي پيچيلدادي.
"دوستلار"ين قاييتماغي چوخ دا اوزون چکمه دي. گئدنلرين هاميسيندان تئز باليق گلدي؛ او اؤز "ننني" سينده - دوغما سولارين قوينوندا، دجل اوشاق کيمي آتيليب-دوشوردو. سونرا قارتال دا گؤروندو. او
قانادلاريني چتير کيمي آچيب سمادا گئنيش بير دؤوره ووراراق جايناغيندا توتدوغو ايري شالي، دقيق نيشانچي کيمي يوخاريدان دوز قاييغين ايچينه آتدي. توقاي شالي تانيدي: بو، شهلانين شالي ايدي. آز سونرا آلاباش گليب چيخدي. او ديشلري ايله دستگيندن ياپيشديغي آواري بير نئچه دفعه فيرلاديب قاييغا ساري آتدي... توقاي آواري گؤيده قاپدي. ديققتله باخدي: بو، اونون اؤز آواري ايدي...
دوستلار بير گؤز قيرپيميندا قاييغا دولوشدولار.
آرتيق هاوا قارالميشدي.
توقاي آوارلاري چکيب قاييغين ايستيقامتيني موعينلشديردي.
ساحيلده کي قادينلار سس-سسه وئريب اونلاري هارايلاييرديلار:
- ائهئي... توقاي! اوغلوم! مني ائشيديرسنمي؟
-توقاي! منم، شهلايام… قاييغي ساحيله دؤندر!
-ياقوت!
-آيقوت!
-قايوت!
- ائهئي! قورخمايين! بيز بوراداييق! بيز سيزينله یيک!..
***
ساحيله يان آلان قاييغين بورنو قومسالليغا ايليشيب خيرچيلدادي.
توقاي جلد يئره آتيليب هئيکل کيمي يئرينده دونوب قالميش قادينا ساري قاچدي.
آنا سئوينجيندن هؤنکوروب آغلاييردي.
شهلانين باخيشلاري يئره ديکيلميشدي.
آز سونرا قادين توقايدان آرالانيب ساحيل سولاري نين يئلله ديگي قاييغا دوغرو آدديملادي.
اوغلانلا قيز گؤزالتي بير-بيريني سوزدو. شهلانين ظولمت گئجه کيمي قاپقارا ساچلاري گوندوز کيمي آغ صيفتينه تؤکولموشدو. قيزين آل-ظريف دوداقلاري خفيفجه تيتره ييردي.
توقاي بو آنلاردا سولارين قوينوندان سييريليب چيخان، دالغالارين ايللر اوزونو يونوب ياپديغي قرانيت هئيکله بنزه ييردي؛ اونون جود-دالغالي ساچلاري کورگينه تؤکولموشدو؛ گريلميش قاشلاري نين آلتيندان ماراقلا قيزي سوزن گؤزلري نين درينليگينده بير اوشاق معصوملوغو سئزيليردي. اوغلانين ائنلي آلنيندا، عضله لي قوللاريندا و هيجانلا ائنيب-قالخان گئنيش کؤکسونده پوچورلانان دامجيلار قيزين بوينونداکي بويونباغي نين اينجي دنه لري کيمي برق ووروردو.
اونلارين هر ايکيسي قامتلي، بوي-بوخونلو، ياراشيقلي ايدي. اونلار بو آنلاردا دونيانين ان خوشبخت اينسانلاري ايدي.
باياقدان بري قاييغين اطرافيندا وورنوخان "دوستلار" آز سونرا قاديني دؤوره يه آلديلار.
شهلا ايله توقاي دا آنايا ياخينلاشدي.
دالغالارساحيلي يالاييردي.
قاييق ننني کيمي ييرغالانيردي.
اونلارين هاميسي باش-باشا وئريب بير موددت سسسيز-سميرسيز، دنيزه تاماشا ائله ديلر. سوندا آنانين پيچيلتيسي ائشيديلدي. قادين دنيزه آلخيش ائله ييردي. بير آزدان خفيف کولک قالخدي. آنا سسيني بير قدر قالديريب کوله يه خطابن دئدي:

بالامي منه قايتاردين، کولک…
سنه مينننتدارام،
سنه بورجلويام، کولک…

آنانين زومزومه سي گئت-گئده شيرين بير نغمه يه چئوريليردي. شهلا ايله توقاي دا آنا ايله بيرليکده اوخوماغا باشلاديلار. سونرا سانکي مؤعجيزه باش وئردي؛ اونلارين سسينه يئني سسلر قوشولماغا باشلادي: ياقوت، آيقوت و قايوت اونلارلا بيرگه سس-سسه وئرميشدي. بير قدر سونرا دنيزله کولک ده اونلارا قوشولدو. هره اؤز ديلينده اوخويوردو بو ماهنيني؛ آما بو چوخسسلي "خور" دا هامي بير-بيريني ياخشي باشا دوشوردو…
بو کايناتدا هر جانلي نين و هر اووقاتين اؤز سسي وار. بدبختليگين اؤز سسي اولدوغو کيمي، خوشبختليگين ده اؤز سسي اولور…
ايندي خوشبختليک اؤز نغمه سيني اوخويوردو…
***
آي دوغموشدو. دنيزين قوينو ايله بير قاييق شوتويوردو. اولجه او قاييغين ايچينده اوچ آدام واردي: قادين، قيز و اوغلان. او قاييقدان بير آز آراليدا - بؤيوک تورپاقدا، ساهيل بويو بير ايت قاچيردي.
او قاييغين اوستو ايله بير قارتال قاناد آچيب ايره ليیه دوغرو اوچوردو.
همين قاييغين دوز بورنونون اوجو ايله گوموشو بير باليق اوزوردو و سانکي همين باليق او قاييغا يول گؤستريردي.
اعتيبارلي و صداقتلي "دوستلار" قاييغي و قاييغين ايچينده کي لري قورودان، هاوادان و سودان موشاهيده و موشاييعت ائديرديلر.
پارلاق آي دالغالارين قوينوندا چيميردي.
بير مودت سونرا "دوستلار" - قارتال، باليق و ايت يايدان آتيلان اوخ کيمي شيغيييب بيرجه آندا قاييغين ايچينه دولوشدولار. ايندي قاييغين ايچينده آلتي جانلي واردي: توقاي، آنا، شهلا، ياقوت، آيقوت، قايوت. اونلارين هاميسي بير عاييله نين، بير اوجاغين عوضوو ايديلر. هر بيري يورولوب الدن دوشموش، سوستلشميسدي. آما يورولان تکجه بدنلري ايدي؛ اصلينده اونلار، همين آنلاردا، بايرام ائديرديلر. بو بايرام اونلارين ايچينده- قلبينده ايدي...
آوار ترپنديکجه سولارين آستا، سِحرلي پيچيلتيسي ائشيديليردي. کيچيک دالغالارين اوستونده کي پارلاق اولدوزلار سانکي سئوينجدن آتيليب-دوشوردو...
قاييقدا ساکيتليک ايدي. ندنسه هامي سوسوردو. کناردان باخان اولسايدي، دوشونردي کي، يقين "دوستلار" دا اؤز سيرلي دونياسينا قاپيليب. توقاي آرتيق نه واختدان بري بئينيني مشغول (بلکه ده ايشغال) ائدن سواللارا يئنه ده جاواب آختارماقدا ايدي: گؤره سن، گونلرين بير گونو اونلار اؤز وطنلرينه، يعني قارتال سمايا، باليق دريايا، آلاباش ايسه مئشه يه اوز توتوب گئده جکديمي؟ گؤره سن، بو صداقتلي "دوستلار"ي قارشيدا نه گؤزله ييردي: آيريليق، يوخسا؟...
توقاي اَييليب "دوستلار"ينين اوزونه باخدي؛ آي ايشيغيندا اونلارين هاميسي نين گؤزلري پار-پار يانيردي. اوغلان حئيرته گلدي: طبيعتين بو قورخماز اؤولادلاري نين گؤزلري قايغيلي، غوصه لي اينسان گؤزلرينه نئجه ده بنزه ييرميش!
توقاي دوشونجه لر دنيزينده اوزوردو. او، اؤزونون بو قيسا حياتيندا اينسانلاردان چوخلو ضربه لر آلميشدي. سونونجو ضربه ني ايسه اونا دنيز جاناواري ائنديرمک ايسته ميشدي. آما "دوستلار" واختيندا کؤمه يه چاتميشديلار. او، اؤز "دوستلار"يندان حدسيز درجه ده راضي ايدي. بونلار حتّی اونون - توقايين باليقچي دوستلاري نين بير چوخوندان صداقتلي چيخميشدي. او عادي معناسيز شئيلر اوستونده موباحيثه ائدن، کوسوشن، ووروشان اينسانلاري آز گؤرمه ميشدي. باليقچي دوستلاري آراسيندا دا بئله لري واردي. آما بونلار... توقاي اؤز "دوستلار"يني عؤمرو بويو سئوه جکدي. "دوستلار"ي اونا آنا قدر، شهلا قدر عزيز و دوغما ايدي.
توقاي دنيزده اؤلومله حياتين چارپيشماسي نين شاهيدي اولموشدو. و اؤزو اوچون قطعي بير قناعته گلميشدي: سن دئمه، اينسانلارلا ديگر جانليلارين آراسيندا ائله ده بؤيوک بير فرق يوخموش؛ حتّی ايلک باخيشدا "ديل آنلامايان" کيمي تاثير باغيشلايان حئيوانلار بئله، اصل حقيقتده عدالت و رحم حيسسينه ماليک اولورموشلار. سن دئمه، حقيقتين مؤوجودلوغونو و اونون هر کس اوچون محض حقيقت اولدوغونو آنلاماق اوچون کيم و يا نچي اولماغين ئله بير موهوم فرقي يوخموش. حقيقتي تکجه اينسان درک ائتمير کي! توقاي ايندي تاماميله امين ايدي کي، کايناتدا باش وئرن بوتون حاديثه لر بير-بيري ايله گؤرونن و گؤرونمز تئللرله باغليدير و کايناتين اؤزو بئله، هارادانسا ايداره اولونور؛ او ايداره ائدن وارليغين مؤوجودلوغونو درک ائتمک اوچونسه، هئچ ده اوزون بير عؤمور ياشاماغا ائحتيياج يوخدور؛ بعضاً حقيقت بيرجه آندا اوزه چيخير. دونيادا هئچ نه ايزسيز-سوراقسيز اؤتوب-کئچمير؛ هر کس کئچميشده ائتديگي نين، ايندي ائله ديگي نين و گله جکده ائده جکلري نين حاقيني آلير. پيسليک پيسليکدن، ياخشيليقسا ياخشيليقدان دوغور. دئييرلر کي، باليغي آت دريايا، باليق بيلمه سه ده، خاليق بيلر. آما، سن دئمه، هردن، هر شئي تاماميله آيري جور ده اولورموش: بعضاً باليغين دريايا آتيلماسيني خاليق يوخ، تکجه باليق اؤزو بيليرميش. بئله چيخيردي کي، يالنيز سه نين هاچانسا خيلاص ائتديکلرين بير واخت سه نين خيلاصکارين اولا بيلر. سه نين محو ئتديکلرين ايسه، گونلرين بير گونو تزه دن ظوهور ائديب سني او دونيايا- گئدرگلمزه گؤندره بيلر. بوتون جانليلارين حياتي بير-بيرينه بنزه يير. يقين کي، بو سونسوز عالمده کوللدن ذره يه، ذره دن کولله جن هامي، هر کس، لاپ ائله هر شئي، عيني قانونلارلا ياشايير. لاکين اينسان نه قدر گوجلو اولورسا-اولسون، او هئچ ده هر شئيه قادير دئييلدير. توقاي اؤزلوگونده امين اولدو کي، دونياني دوچار اولدوغو بوتون بلالاردان خيلاص ائتمک اوچون تکجه اينسانلارين بير-بيريله دوستلوغو و علاقه سي بس ائده بيلمز؛ کايناتي هر جور فلاکت و موصيبتدن يالنيز بير يوللا- جانسيزلارلا جانليلارين همريليگي، بير سؤزله، کوللدن ذره يه جن مؤوجود اولان هر نه وارسا، محض اونلارين، بلي، يالنيز اونلارين هاميسي نين بيرليگي واسيطه سي ايله خيلاص ائتمک مومکوندور. بس ازلدن وار اولان، عؤمرو بو دونيانين عؤمرونه برابر اولان بو بيرليگي گؤرنلرين، حيسس ائدنلرين، قاورايانلارين سايي چوخ ايديمي؟ و بو آنلاردا، توقايا سانکي بيردن-بيره او دا عيان اولدو کي، اصلينده، بو دونيادا "جانسيز" ، "ديلسيز-آغيزسيز " هئچ نه يوخدور؛ اينسانلار کيمي لاپ ائله داشين، آغاجين، اوتون، کولگين، سويون دا تکجه اونلارين اؤزلرينه بللي اولان سيرلي بير عالمي وار. اينسان بو عالمه هله يئترينجه بلد دئييل. يئرده چيچکلر، گؤيده ايسه اولدوزلار بير-بيريله صؤحبتلشير. لاپ اينسانلار کيمي... هئچ شوبهه سيز کي، زامان گله جک "جانليلار" و "جانسيزلار" بير-بيريله ديل تاپيب دانيشاجاق، بير-بيرلري نين حاليندان خبردار اولاجاق... توقايلا "دوستلار"ي کيمي...
" شوکور اولسون سنه، تانريم! "
آوارلاري آستا-آستا چکيب شيرين خياللار دنيزينده اوزن توقايين اؤزو کيمي يورغون قاييغي، نهنگ دنيزين آغير سولاريني ياراراق ايره ليیه دوغرو اوزوردو.
قاييغين ايچينده کي لر ايسه، دئيه سن، آرتيق يوخويا گئتميشديلر.
توقاي مورگو دنيزينده اويويان آناسينا گؤز اوجو نظر سالدي: قادي نين اورگينده چاغلايان سونسوز خوشبختليگين، يالنيز اورکله دويولا بيله جک، خفيف ايزلري بو پارلاق آي ايشيغيندا اونون گون کيمي آيدين صيفتينه ياييلميشدي.
سونرا اوغلانين باخيشلاري غئيري-ايختيياري بوينو ظريف قرنفيل کيمي يانا اَييلميش شهلانين اوزونه سانجيلدي. قيزين توتقون ساچلاري ظريف صيفتينه داغيلميشدي؛ ائله بيل کي، آيين قاباغيني بولودلار اؤرتموشدو. توقاي اورگي اوچونا-اوچونا اليني ايره لي اوزاديب قيزين صيفتينه کؤلگه سالميش ايپک کيمي يومشاق، بنؤوشه کيمي عطيرلي تئللري ائهمالجا يانا "دارادي" . قيز يوخودا شيرين-شيرين گولومسيه رک، اوغلانين جود-قابارلي اللريني سيغاللاييب اؤزونون باليق کيمي چيرپينان ظريف سينه سينه سيخدي .
قاييغين آرخا حيصه سينده گؤللنميش سودا مورگوله ين ياقوت يئريندن ديکه ليب آني اولاراق گؤزلريني آچيب-يومدو.توقاي عؤمرونده ايلک دفعه ايدي کي، گؤزونو قيرپان باليق گؤروردو؛ آخي باليقلار حتّی سويون تکينده ياتاندا بئله، گؤزلريني يوممورلار.
آيقوت قانادلاريني گريب تزه دن چتير کيمي ييغدي.
قايوت قويروغونو يونگولجه ترپتدي.
آنا هله ده يوخودا ايدي؛ او ايندي اؤزونون ان گؤزل واقعه لريندن بيريني گؤروردو: گؤروردو کي، نهنگ دنيزين اوستو ايله ايکي نفر ال-اله توتوب ساحيله ساري قاچير. آنا ساحيلده دايانميشدي؛ او گلنلري سيلوئتلريندن تانيدي: بونلار توقايلا شهلا ايدي. حئيرتدن آنانين گؤزلري بؤيودو: غريبه ايدي، قيزلا اوغلان دنيزين اوستو ايله قاچسالار دا بئله، سودا باتميرديلار. اونلار سانکي دالغالارين سطحي ايله يئريمير، قاناد آچيب سولارين اوستو ايله اوچوردولار. آما آنا اورگي سکسکه ده ايدي. او يوخودا دا دوعا ائديردي: "تانريم، اؤزون کؤمک اول..." جاوانلار، بلکه ده لاپ تانري نين اؤزو، آنانين خطابيني ائشيتدي، دئيه سن؛ آز سونرا توقايلا شهلا قاچاراق ساحيله جيخديلار و آناني قوجاقلاييب اؤپمه يه باشلاديلار. آنا نئجه ده خوشبخت ايدي...
توقاي يئنه اَييليب شهلانين اوزونه باخدي: قيز هله ده يوخودا گولومسه ييردي. شهلا بو آنلاردا بير نئچه گون اولکي غريبه ، ياريمچيق يوخوسونون داواميني گؤروردو؛ گؤروردو کي، لاجيورد سولارا سپلنميش رنگبرنگ گوللر ايندي توقايين قاييغي نين آرخاسينجا اوزوب گئدير. و بو غريبه يوخودا شهلا باشيني توقايين چيينينه قوياراق، هئچ اؤزو ده بيلميردي کي، ندنسه آغلاييردي. سانکي قيزين گؤزلريندن لئيسان آخيردي؛ بو بلکه ده سئوينجين گتيرديگي گؤز ياشلاري ايدي. هه، بير ده کي، عادتن، يوخولاردا چوخ شئي ترسينه اولور.
گؤيون سينه سينه سانجيلميش قيزيلي آي، بو آنلاردا اؤزونون دنيزده يويونان عکسينه باخيب خومارلانيردي.
ايندي بو اوجسوز-بوجاقسيز سو سلطنتي نهنگ بير صحراني خاتيرلاديردي. قاييق بو صحرادا کارواندان آرالي دوشموش يورغون دوه کيمي آغير-آغير ايره ليله ييردي. آرابير قاييغين سينه سيني اؤپوب کئچن کيچيک دالغالارسا بومبوز قوم صحراسيندا قيوريلان قوم لپلرينه بنزه ييردي.
ائله بيل کي، بالاجا بير کؤچ اوزون، آغير بير سفردن گئري دؤنوردو. بو موقدس زيارتدن قاييدان زووار کؤچونه ده بنزه ييردي.
بو کؤچ، دنيز کؤچو ايدي.
بير آزدان گونش دوغاجاقدي.
دنيز کؤچو قيزاران دان يئرينه دوغرو اوزوردو.
آرتيق دنيز ده مورگوله ييردي.
***
منيم سيزه سؤيله مک ايسته ديگيم بو غئيري-عادي احوالات باخ، بوراداجا باشا چاتير.
دوغروسو، بو حاديثه ني منه باشقا آدام، قوجا بير باليقچي دانيشيب. بيز اونونلا دنيز ساحيلينده باليق توتارکن تانيش اولموشدوق. ندنسه، اوندا منه ائله گلدي کي، بو احوالات نه واختسا ائله اونون اؤز باشينا گليب. چونکي... من خوداحافيظلشيب قوجادان آيريلاندا، او آوار کورگي کيمي ايري، مؤحکم اليني ايره لي اوزاديب آستادان اؤز آديني دئدي:
- توقاي...
من قوجادان آيريلديم.
همين واختدان بري، او دنيز کؤچو، گؤرونمز رسسام الي نين چکديگي فوسونکار بير تابلو کيمي گؤزلريمين اؤنوندن آسيليب. بلي، دونيادا دنيز کؤچو ده اولورموش.












_________________________________

فيروز موصطافا
ناثير، دراماتورق، ائسسئيست، فيلوسوف

فيروز موصطافا 40-دان چوخ بديعي و علمي کيتابين مؤليفيدير. تئاترلاردا اونون اونلارلا پيئسي تاماشايا قويولموشدور.
فيروز موصطافانين بديعي ياراديجيليغيني سجيييه لنديرن اساس جهتلردن بيري اونون اثرلري نين درين پسيخولوگيزميدير.
"دنيز کؤچو" اينسان و طبيعت آراسينداکي قارشيليقلي هارمونييادان و حسساس دئتئرمينيست علاقه دن بحث ائدير.
گرگين سوژئت خطينه ماليک اولان اثرده باش وئرن گؤزله نيلمز حاديثه لر سورعتلي کينو کادرلاري کيمي بير-بيريني عوض ائدير.
بو اثر سيزي و سيزين حياتا باخيشينيزي دييشه بيلر.
امينيک کي، گئنيش اوخوجو آوديتوريياسينا عنوانلانميش "دنيز کؤچو"نو ياشيندان آسيلي اولماياراق، 7-دن 77-يه دک، بوتون کيتاب سئورلر ماراقلا اوخوياجاقلار.


______________________________________
... باليقچي قاييغي دنيزده فيرتينايا دوشور...
... توقاي هئيبتلي دنيز وحشيسي ايله البه ياخا دؤيوشه گيرير...
... گنج باليقچي نين اوچان، قاچان و اوزن "دوستلاري" اونو آختارماق اوچون دنيزه ساري اوز توتورلار...







6 dəfə oxundu

Axtarış